Ураһалаах алааска майалар салама ыйаатылар, алгыс ыллылар

Бүгүн күөх сайыны уруйдуу көрсөр Ньукуолун күнэ, Саха сиригэр Сайылык күнэ үүннэ. Саха дьонугар самаан сайын кэлиитэ сайылыкка көһүү олус да кэрэ кэм буоллаҕа.

Бу күн Майа дьаһалтатын уонна Д.Ф.Ходулов аатынан култуура киинин көҕүлээһиннэринэн Ураһалаахха сэрии сылларын оҕолоро, уопсастыбанньыктар, анал байыаннай дьайыы кыттыылааҕын дьиэ кэргэнэ айылҕаҕа сүгүрүйэ, ыраастана, алгыс ыла тиийдилэр.

Алгысчыт Анна Климентова аал уотун үрүҥ сылгы сиэлинэн маанылаан, арыылаах алаадьынан айах тутан сиэр-туом толордо. Саха дьоно эргэ дьылы этэҥҥэ туораан, саҥа дьылы көрсүбүппүтүгэр махтанан алгыс көтөҕүлүннэ. Манна дьон-сэргэ сэлэлии туран Үрдүк Айыыларга сүгүрүйдэ, аар хатыҥнарга салама ииллэ, салгын кутун сайҕаата, буор кутун бөҕөргөттө. Алгыһы “Кыталыына” үҥкүү бөлөҕө “Салама” үҥкүүтүнэн иҥэрдэ.

Самаан сайыны көрсөр дьоро күнүнэн Майа сэлиэнньэтин баһылыгын социальнай уонна имиджевэй бэлиитикэҕэ солбуйааччы Вячеслав Санников эҕэрдэлээтэ:

-Ыам ыйын 22-с күнэ биһиэхэ, сахаларга, олус дириҥ суолталаах. Майалар сайылыкпыт тэҥэ буолар Ураһалаах алааспытыгар кэлэн өбүгэлэрбититтэн кэлбит үтүө үгэһи салҕааммыт сайыммытын үөрэ-көтө көрүстүбүт, олус үчүгэй алгыс ыллыбыт. Сыллата ыытыллар маннык тэрээһиннэргэ бары көхтөөхтүк кэлэн кыттаргытыгар барыгытыгар махталбытын биллэрэбит. Дьоллоох буолуҥ, чэгиэн буолуҥ.

Федора Наумова салайааччылаах “Ай-талаан” бөлөх иистэнньэҥнэрэ сахалыы мааны таҥастарын кэтэн хараҕы сымната долгулдьуһа хаамтылар. Евдокия Семенова салайааччылаах “Айыллыат” фольклор бөлөҕө Станислав Иванов “Хара буурай аттаах хорсун-хоодуот Хатан Боотур” олоҥхотуттан быһа тардан толоруулара түһүлгэни киэргэттэ. Линда Захарова дьол-үөрүү туһунан ырыанан эҕэрдэлээтэ.

Сайыны көрсүүнү Д.Ф.Ходулов аатынан култуура киинин исписэлииһэ Галина Эверстова иилээн-саҕалаан ыытта. Кини көрдөөх-нардаах оонньууларыгар кыттан баартаах өттө бириистэри тутан үөрдэ-көттө.

Сандалы остуолга олорон сахалыы лапсалаах сибиэһэй кус миинэ истибит, үөрэ оттоох саламаатынан үссэннибит. Үөрүүнү бэлэхтээбит сэлиэнньэбит байанайдаах булчуттарыгар, “Түмэн” холбоһук уопсастыбанньыктарыгар, олохтоох дьаһалта үлэһиттэригэр, успуонсар Евдокия Артемьеваҕа барҕа махтал буоллун.

Дьоро күнү Саха Өрөспүүбүлүкэтин үтүөлээх этээччитэ Людмила Неустроева оһуохайынан үөрүүлээхтик түмүктээтибит.

Алгыс баһа сыаланнын!

 

Марелла Баишева.