Уопсай дьиэҕэ олорооччулар болҕомтолоругар

Бэчээттэммиккэ эргиллэн

Хаһыат бу дьыл сэтинньи 28 күнүнээҕи нүөмэригэр «Төлөбүр киириититтэн сайдыы соруктара торумнаналлар» диэн ааттаах «Якутскэнергосбыт» Илин эҥэрдээҕи салаатын Мэҥэ Хаҥаластааҕы учаастагын начаалынньыгын Павел Денисовы кытары тэрилтэ үлэтин-хамнаһын сырдатан кэпсэтии бэчээттэммитэ. Ааҕааччыларбыт ити кэпсэтиини сэҥээрбиттэрин итиэннэ чуолаан элбэх кыбартыыралаах уопсай дьиэҕэ олорооччулары кыбартыыра таһыгар, ол эбэтэр подъезд иһинээҕи, дьиэ таһынааҕы уот төлөбүрүн ааҕыллыыта эбии интэриэһиргэтэрин биллэрдилэр. Онон ити ыйытыкка толору хоруйу биэрэргэ «Якутскэнергосбыт» Илин эҥэрдээҕи салаатын Мэҥэ Хаҥаластааҕы учаастагын исписэлиистэриттэн быһааралларыгар көрдөстүбүт.

 

ОДН диэн тугуй?

ОДН аббревиатуратураны быһаардахха, нууччалыы тылынан «общедомовые нужды» дэнэр. Элбэх кыбартыыралаах дьиэлэргэ олорор дьоҥҥо  уоту, ууну уонна ититиини уопсай туһаныыларын иһин хомунаалынай өҥөлөргө төлөбүр ирдэниллэр. Ол аата подъезд иһинээҕи, дьиэ таһынааҕы сир-уот РФ Олорор дьиэ  кодексынан, элбэх кыбартыыралаах дьиэҕэ олорооччулар уопсай бас билиилэригэр киирсэр. Бу кодекс 158-с ыстатыйатын 1-кы чааһыгар уонна РФ Бырабыыталыстыбатын 2012 с. балаҕан ыйын 1 күнүнээҕи үлэҕэ киирбит 2011 с. ыам ыйын 5 күнүгэр ылыныллыбыт 354 №-дээх уурааҕынан бигэргэммит элбэх кыбартыыралаах олорор дьиэлэргэ хомунаалынай өҥөнү оҥоруу Быраабылаларын 40-с пуунугар олоҕуран олохтоохторго ОДН ороскуотун төлөһөр эбээһинэс сүктэриллэр.

 

Төлөбүр хайдах ааҕылларый?

Уопсай туттуллар уот, уу, бэриллэр ититии уопсай учуоттуур прибор көрдөрүүтүнэн ааҕыллар.

Бүгүн ОДН уот төлөбүрүгэр ааҕыллыытыгар тохтуубут. Судургутук быһаардахха маннык: элбэх кыбартыыралаах дьиэҕэ уопсай уоту учуоттуур прибор көрдөрүүтүттэн биирдиилээн кыбартыыраларынан бэриллибит дааннайдар көҕүрэтиллэн уопсай туһаныллыбыт уот кээмэйэ тахсар. Өскөтүн сорох кыбартыыралартан дааннай кэмигэр түспэтэх буоллаҕына, кинилэргэ ороскуоттара нуорма быһыытынан орто кээмэйинэн ааҕыллар. Онон уопсай дьиэ бары кыбартыыраларын көрдөрүүлэрэ учуоттанар. Ол кэннэ хаалбыт көрдөрүү кыбартыыралар уопсай иэннэригэр сөп түбэһиннэрэн уопсай дьиэҕэ олорооччуларга барыларыгар түҥэтиллэр. Ити суума ОДН көрдөрүүтүнэн ааҕыллар.

Сорохтор уопсай уот төлөбүрэ ый ахсын төлүүр эрэ дьоҥҥо ааҕыллар, төлөөбөт дьон көрдөрүүлэрин биэрбэттэринэн кинилэргэ ааҕыллыбат диэн өйдүүллэр. Оннук дуо диэн ыйытыыга исписэлиистэр эппиэттэрэ биир ‒ суох, сыыһа, кыбартыыраларга барыларыгар үллэриллэр.

Уопсай учуоттуур прибора суох дьиэлэргэ

Маннык түгэҥҥэ уопсай туһаныллыбыт электро-уот иһин хомунаалынай өҥөлөр төлөбүрдэрин быраабылаларын 48-с ыстатыйатыгар олоҕуран, төлөбүр суумата РФ Бырабыыталыстыбатын 2006 с. ыам ыйын 23 күнүнээҕи 306 №-дээх уурааҕынан олохтоммут нуорманан көрүллүбүт (норматив) көрдөрүүтүн уопсай туһаныыга киирэр иэҥ кээмэйигэр  олорор кыбартыыраҥ иэнин  бары кыбартыыралар иэннэригэр түҥэтэн баран төгүллүүгүн. Киһи өйүгэр дэбигис киирбэт быһаарыы да буоллар, анал пуормуланы көннөрү тылынан быһаардахха итинник.

Уопсай учуоттуур прибор турар дьиэлэригэр

ОДН кээмэйэ уопсай учуоттуур прибор көрдөрүүтүнэн ааҕыллар. Ити прибор көрдөрүүтүттэн бары кыбартыыралар туһаммыт кВт эбиллэн көҕүрэтиллэр итиэннэ кыбартыыраҥ иэнигэр түҥэтиллэр. Ол аата судургутук өйдөөтөххө, ОДН кыбартыыраҥ иэниттэн эмиэ тутулуктаах буолар эбит. Икки хостоох кыбартыыраҕа олорор киһи биир хостооххо олорооччуттан төлөбүрэ атын буолар. Төһөнөн кыбартыыраҥ иэнэ улахан да, оччонон төлөбүрүҥ эмиэ улаатар. Ол аата элбэх кыбартыыралаах дьиэҕэ олорооччулар төлөбүрдэрин кээмэйэ тэҥ буолбат.

Уопсай учуоттуур прибор төһө дьиэҕэ турарый?  

Мэҥэ Хаҥалас улууһугар элбэх кыбартыыралаах барыта 94 уопсай олорор дьиэ олохтоохторо уоту туһаныыга төлөбүрдэри оҥороллор. Итинтэн 66 дьиэҕэ уопсай учуоттуур прибор туруоруллан төлөбүр ааҕыллар. Оттон хаарбах, саахалланар туруктаах уонна атын тэхиньиичэскэй биричиинэнэн 26 дьиэҕэ уоту туһаныыга уопсай учуоттуур прибор туруоруллубатах.

Түмүккэ элбэх кыбартыыралаах дьиэлэр олохтоохторугар туһаайан электро-уоту уопсай туһаныы иһин булгуччулааҕынан иэскэ киирбэккэ болдьоҕор төлөһөн иһэргитигэр ыҥырабыт.

Алена ДОКТОРОВА.