Уоланнарбыт салайар сатыбылларын сайыннарыыга туһуланар «Мин баһылыкпын» оонньуу Василий Скрябин төрөөбүтэ 80 сылыгар ананна

Бүгүн, олунньу 9 күнүгэр, Мэҥэ Хаҥалас улууһун бастакы баһылыгын Василий Скрябин аатын сүгэр Чүүйэ орто оскуолатыгар «Мин баһылыкпын» оскуола үөрэнээччилэрин ортотугар улуустааҕы дьыалабыай оонньуу ыытылынна.

Куонкурус ытыктыыр биир дойдулаахпыт норуот хаһаайыстыбатын үтүөлээх үлэһитэ, Мэҥэ Хаҥалас уонна Хаҥалас улуустарын Бочуоттаах гражданина, улууспут бастакы баһылыга, Санкт-Петербург куоракка Саха Өрөспүүбүлүкэтин бастакы бастайааннай бэрэстэбиитэлэ Василий Васильевич Скрябин төрөөбүтэ 80 сылыгар ананна.

Бу тосхол уол оҕону сахалыы сиэргэ-майгыга иитиигэ, өй-санаа өттүнэн сайыннарыыга, киэҥ эйгэҕэ таһаарыыга, уопсастыбаҕа уол оҕо оруолун үрдэтиигэ туһуланар.

«Мин баһылыкпын» дьыалабыай оонньууну Чүүйэ орто оскуолатыгар 2019 сылтан саҕалаан ыыталларын, онон быйыл 6-с сылын тэрийэллэрин, бүгүҥҥү куонкурус сыалын-соругун сиппитин, олус үчүгэйдик ааспытыттан дьон астынан барбытын туһунан биһиэхэ В.В.Скрябин аатынан Чүүйэ орто оскуолатын дириэктэрэ Милан Илларионов иһитиннэрдэ.

Бүгүҥҥү дьыалабыай оонньууга кыттар 9 уол бастаан оскуолаларын иһигэр, онтон чугастыы нэһилиэктэр оскуолаларын холбоһуга тэрийбит күрэһигэр ситиһиилэнэн, талыллан кэлбиттэр. Кинилэр «Удьуор утума», «Улууспут бэлитиичэскэй диэйэтэллэрэ тус бэйэм көрүүбэр», «Өркөн өй», «2035 сылга биһиги улууспут уонна кини салайааччыта» дьыалабыай оонньууга уонна «Айыы умсулҕана» диэн түһүмэхтэргэ санааларын сайа эттилэр, төрүттэрин-уустарын билиһиннэрдилэр, билиилэрин, айар дьоҕурдарын тургуттулар.

Оҕолорбут дьыалабыай оонньууга кыттыыларын улуус баһылыга Дмитрий Тихонов, дьокутааттар улуустааҕы сэбиэттэрин бэрэссэдээтэлэ Иннокентий Андросов, үөрэх управлениетын начаалынньыга Гаврил Толстяков, социальнай бэлиитикэҕэ управление начаалынньыга Октябрина Кулешова уонна Чүүйэ орто оскуолатын дириэктэрэ Милан Илларионов болҕомтолоохтук көрдүлэр-иһиттилэр, дьүүллээтилэр.

Дьүүллүүр сүбэ быһаарыытынан бастыҥ лиидэр уолаттарбытыгар анал ааттар иҥэрилиннилэр. «Өркөн өй» анал ааты И.М.Романов аатынан Төхтүр орто оскуолатыттан Алгыс Попов ылла,  «Удьуор утумнааччы» аат В.П.Ларионов аатынан Майа орто оскуолатын үөрэнээччитигэр Андрей Расторгуевка, «Айар кут» аат – В.В.Скрябин аатынан Чүүйэ орто оскуолатын үөрэнээччитигэр Давид Романовка, «Сайдам санаа» аат – М.П.Габышев аатынан Балыктаах орто оскуолатын үөрэнээччитигэр Тит Артемьевка, «Кэскиллээх кыттааччы» аат – Моорук орто оскуолатын үөрэнээччитигэр Эрчим Лобановка, «Кыайыыга дьулуур» аат – Н.Д.Неустроев аатынан Бэдьимэ орто оскуолатын үөрэнээччитигэр Арсен Плотниковка, «Ылыннарыылаах тыл» аат – К.Алексеев аатынан Хаптаҕай орто оскуолатын үөрэнээччитигэр Айтал Максимовка, «Хомоҕой тыл» аат – Т.Г.Десяткин аатынан Тумул орто оскуолатын үөрэнээччитигэр Артем Куличкиҥҥа, «Добун» аат – С.Н.Михайлов аатынан Чыамайыкы орто оскуолатын үөрэнээччитигэр Антон Захаровка иҥэрилиннэ.

Дьыалабыай оонньууга ситиһиилээхтик кыттыбыт Төхтүр оскуолатын 8-с кылааһын үөрэнээччитэ Алгыс Попов бүгүҥҥү тэрээһинтэн астыммытын, манна бэлэмнэнэригэр элбэҕи билбитин-көрбүтүн, бэйэтин саастыылаахтарын кытта алтыспытын туһунан эттэ итиэннэ бу күрэс кинилэргэ улуус баһылыгын кытта аһаҕастык санаа үллэстэр кыах биэрбититтэн олус үөрдүм диэтэ.

Уоланнар салайар сатабылларын сайыннарыыга туһуланар күрэс тэрийээччилэринэн Чүүйэ орто оскуолата уонна «Кэрэли» оҕону эбии үөрэхтээһин киинин иһинэн «Мэҥэ кэскилэ» оҕо хамсааһынын сүрүннүүр киин буолаллар.

В.В.Скрябин аатынан дьыалабыай оонньуу кыайыылааҕын сарсын, олунньу 10 күнүгэр, Мэҥэ Хаҥалас улууһа төрүттэммит күнүгэр аналлаах үөрүүлээх тэрээһиҥҥэ биллэриэхтэрэ, үс кыайыылаах оҕоҕо улуус баһылыга анал наҕараадалары туттарыаҕа.

Күрэс муҥутуур кыайыылааҕа аны саас муус устарга ыытыллар өрөспүүбүлүкэтээҕи «Басхан» күрэскэ улууһун чиэһин көмүскүү барыаҕа.

 

Февронья ОХЛОПКОВА.