Быйылгы улууспут ыһыаҕа Майабыт сэлиэнньэтин ытык-мааны Ураһалаах алааһыгар бэс ыйын 15 күнүгэр Арассыыйаҕа Дьиэ кэргэн, өрөспүүбүлүкэҕэ Оҕо саас, улууска Тыа хаһаайыстыбатын, Үөрэхтээһин 150, Уустаах Избеков төрөөбүтэ 115, Валерий Ноев 85 үбүлүөйдээх сылларыгар анаан “Бигэ туруктаах дьиэ кэргэн – дойдубут бөҕө тирэҕэ” диэн аатынан ыытыллан уйгу-быйаҥ түһүлгэтэ олохтонно.
Ыһыах бочуоттаах ыалдьыттарынан Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков, Ил Түмэн дьокутааттара Андрей Находкин, Олег Марков, экэниэмикэ миниистирэ Петр Попов, өрөспүүбүлүкэ Ытык Сүбэтин бэрэссэдээтэлэ Люлия Григорьева, өрөспүүбүлүкэ Дархан оһуокайы этээччитэ Валентин Хорунов, о.д.а. биллэр-көстөр дьон буоллулар.
Өбүгэлэрбититтэн кэлбит үтүө үгэспитинэн Үрдүк Айыыларбытыттан алгыстанан күүс-уох ылар түһүлгэбитин алгысчыттар Спиридон Григорьев‒Илгэлээх Испирдиэн, Георгий Баишев, Денис Оконешников аал уоттарын оттон уйгулаах олохпут огдолуйбатын туһугар көрдөһөн-ааттаһан үрүҥ сылгы сиэлинэн сыт таһаардылар. Бу күн түһүлгэҕэ Майатааҕы “РайПО бэтэрээннэрэ” түмсүү Далбар Хотуттара астаабыт арыылаах алаадьыларынан айах туттулар, эрэкэ-дьэрэкэ оҕолор, Айыы көтөрдөрө кыталыктар үҥкүүлээн үтүөнү түстээтилэр. Ыраахтан-чугастан кэлбит ытык-мааны дьоммут Николай Степанов–Ноорой сиэнэ Аксинья Степанова уруйдаах оһуокайыгар кыттыстылар. Манна Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков, Ил Түмэн дьокутааттара Андрей Находкин, Олег Марков, экэниэмикэ миниистирэ Петр Попов, өрөспүүбүлүкэ Ытык Сүбэтин бэрэссэдээтэлэ Люлия Григорьева, о.д.а. ыҥырыылаах ыалдьыттар, улуус баһылыга Дмитрий Тихонов, бастакы солбуйааччы Василий Михайлов, улуус дьокутааттарын сэбиэтин бэрэссэдээтэлэ Иннокентий Андросов, улууспут управлениеларын салайааччылара кымыс үрдүн охтордулар.
Ыһыах үөрүүлээх арыллыытыгар улууспут Бочуоттаах олохтоохторо, киэн туттар дьиэ кэргэттэрэ, тыабыт сирин уйгутун дэлэтээччи бастыҥ үлэһит дьоно, үөрэҕирии салаатын салайааччылара, Майа оскуолаларын быйыл бүтэрбиттэр, улуус киэн туттар спортсменнара, “Азия оҕолоро” спортивнай оонньуулар кыттыылаахтара холуонналарынан сэлэлии хааман киин түһүлгэҕэ кэллилэр. Улуус баһылыга Дмитрий Тихонов үрүҥ көмүс дуйдаах Ытык Дуоҕаны анньан ыһыах өрөгөйдөөх чааһын арыйда. Саха Өрөспүүбүлүкэтин Бырабыыталыстыбатын бэрэссэдээтэлэ Кирилл Бычков, улуус баһылыга Дмитрий Тихонов, улуус дьокутааттарын сэбиэтин бэрэссэдээтэлэ Иннокентий Андросов эҕэрдэ тылы эттилэр.
“Айыыһыт сыла – дьиэ кэргэн дьолун түһэ, оҕо төлкөтө” диэн таптал иэйиитэ Айыыһыт Хотун Орто дойдуга олох түстэниитин көрдөрөр дьүһүйүүтүгэр сүүһүнэн дьон кыралыын-улаханныын кыттыыта ыалдьыттары, көрөөччүлэри сөхтөрдө, астыннарда. Манна норуот билиниитин ылбыт мелодист, ырыаһыт Валерий Ноев ырыаларынан оҕолор үрүмэччи курдук үҥкүүлээн дайдылар, Уустаах Избеков туруоруутунан сахалары аан дойдуга суон сурахтаабыт “Оһуор үҥкүүтүн” «Кыталыктар» көлүөнэлэринэн киирэн толордулар.
Өрөгөйдөөх чааска Сомолоһуу оһуокайын Дархан этээччи Виталий Никифоров таһаарда.
Алгыстан саҕалаан улууспут ыһыаҕа дьоно-сэргэтэ мааныта, аһа-үөлэ дэлэйэ, көрө-нара кэрэтэ, күрэстэрин таһыма көрбүтү эрэ кэрэхсэттилэр, сылдьыбыты сүргэтин көтөхтүлэр. Улуус баһылыга Дмитрий Тихонов бар дьонун күнү быһа ис миининэн босхо күндүлээтэ.
“Саха сайдам ыала – 2024” улуустааҕы дьиэ кэргэн күөн күрэһигэр улууспут үлэни өрө туппут бастыҥтан бастыҥ, дьоһун-мааны дьиэ кэргэттэрэ Аллараа Бэстээхтэн Кристина, Константин Герасимовтар, Хара нэһилиэгиттэн Анна, Иван Петровтар, Нөөрүктээйиттэн Евдокия Владимир Черкашиннар, 1-кы Баатараттан Саргылана, Николай Андреевтар итиэннэ Майаттан Валентина, Рустам Кривошапкиннар кытыннылар. Кривошапкиннар дьиэ кэргэн муҥутуур кыайыылаах үрдүк аатын ыланнар тыһаҕас бирииһи туттулар.
“Үрүҥ тунах ыһыах мааны мандар таҥаһа” саха таҥаһын көрүү күрэһигэр талба талааннаах дьон-сэргэ көхтөөхтүк кыттан анал ааттарынан бэлиэтэннилэр. Кылаан бириис кыайыылаахтарынан Хаптаҕайтан Ильяна, Егор Ефремовтар дьиэ кэргэн буоллулар.
Алгыс түһүлгэтигэр ыытыллыбыт “Саханы үрдэтиэ оһуокай, кэскили түстүө эһиэкэй” оһуокай куонкуруһугар 15 ааттаах-суоллаах кыттааччы оһуокайы оройуттан туттулар. Дьүүллүүр сүбэ бэрэссэдээтэлинэн СӨ үтүөлээх артыыһа, импровизатор-хомусчут биир дойдулаахпыт Варвара Степанова‒Арчыына, чилиэннэринэн Валентин Хорунов, Станислав Иванов үлэлэстилэр. Манна Дьокуускайтан 5 саастаах ыалдьыт Анита Назарова кыттан инникитин кэскиллээх оһуокайдьыт буолуоҕун көрдөрдө. “Мэҥэ Хаҥалас улууһун Дархан оһуокайдьыта” алтан бэлиэлээх уонна 50000 солкуобай харчынан бириэмийэни Нуораҕанаттан Денис Оконешников уонна “Оһуокай сайдыытыгар өр сыллаах үлэтин иһин” Павловскайтан Николай Карамзин үөрүүлээхтик туттулар. 1-кы үрдэл кыайыылааҕынан Майаттан Ульяна Ефремова ааттанна. Төхтүртэн Саргылаана Мохначевская “Тэтимнээх оһуокайдьыт”, Сунтаартан Уйгулаах Күбэйэ Саарын Кыыһа “Түөлбэ түһүлгэтин төрүттээччи”, Майаттан Валентина Федорова “Хомоҕой хоһоонноох оһуокайдьыт”, 18 саастаах Юрий Павлов “Кэскиллээх этээччи” анал ааттарынан бэлиэтэннилэр.
Улуус ыһыаҕын сэргэ Майа сэлиэнньэтин ыһыаҕа ыытыллан баһылык Алексей Неустроев, Ил Түмэн дьокутаата Олег Марков эҕэрдэлээтилэр, үлэ бастыҥнара наҕараадаланнылар. Оонньуу-көр арааһыгар кыттан оҕо-аймах үөрдэ-көттө. Кыргыттарга “Толбоннурар уһун суһуох”, оҕолорго саастарынан сүүрүүгэ, илии-атах оонньууларыгар, улахан дьоҥҥо “Аһастаах киһи” о.д.а. күрэхтэһиилэр ыытылыннылар. Майа сэлиэнньэтин баһылыгын солбуйааччы Вячеслав Санников кыайыылаахтарга дипломнары, кыһыл көмүс мэтээллэри, мүһэлэри, 2-3-с миэстэлэргэ дипломнары, мэтээллэри сэргэ үтэһэлээх эттэри туттарда.
Мэҥэ Хаҥалас улууһун баһылыгын бирииһигэр хапсаҕайга уонна мас тардыһыытыгар нэһилиэктэр икки ардыларыгар урукку сопхуостарынан “Мэҥэбиллэр” күүстээх аҥардар күөн-күрэстэрэ үрдүк таһымнаахтык ыытыллан көрөөччүлэр биһирэбиллэрин ылла. Комментатор Дьулустаан Захаров хас биирдии мадьыныны киэҥник сырдата олорон күрэхтэһиини сэргэхтик ыытта. Манна Ленин, К.К.Байкалов, М.Горькай, Дьоруой Попов ааттарынан сопхуостар хамаандаларын спортменнара, бэтэрээннэрэ күөн көрүстүлэр. Түмүккэ Максим Горькай аатынан сопхуос хамаандата муҥутуур кыайыылааҕынан тахсан 500000, иккис миэстэни Ленин аатынан сопхуос ылан 300000 уонна үһүс бочуоттаах миэстэни Дьоруой Попов аатынан сопхуос хамаандата ылан 200000 солкуобай уу харчынан наҕараадаланнылар.
Ыһыах сүүйүүлээх түһүлгэтин сүрүн бирииһэ – үөр сылгы хаһаайыттарынан Майаттан 4 оҕолоох, 10 сиэннээх, 1 хос сиэннээх Анисия, Владимир Яковлевтар тиксэннэр, ыччаттарыгар сылгы үөрэ хаҥыы-тэнийэ турарыгар акылаатын уураннар, үөрүү өрөгөйүн биллилэр.
Эстрада биллиилээх ырыаһыттара кыттыылаах улахан кэнсиэр кэннэ ыччаттарга анаан «Үҥкүүлүүр үрүҥ түүн» дискотека, салгыы Үрдүк Айыыларбыт сиргэ чугаһыыр кэмнэригэр саха сиэринэн аламай Күнү көрсүү сиэрэ-туома ыытылыннылар.
Марелла Баишева.
Улуус дьаһалтатын пресс-сулууспатын хаартыскаҕа түһэриилэрэ
Елизавета Неустроева түһэриилэрэ
Марелла Баишева хаартыскаҕа түһэриилэрэ
