Сэтинньи 17 күнүгэр, В.Н.Оконешников аатынан Павловскай орто оскуолатыгар РФ үөрэхтээһинин бочуоттаах үлэһитэ, СӨ үөрэҕирии туйгуна Маргарита Константиновна Петрова сырдык кэриэһигэр анаммыт «Кылаас салайааччыта-2023» күөн күрэһэ буолан ааста. Кэнчээри ыччаты иитии, үөрэтии эйгэтигэр айымньылаахтык үлэлии сылдьар улуус 12 бастыҥ кылаас салайааччылара кыттыыны ыллылар. Уопуттаах кылаас салайааччылара бэйэни билиһиннэрии, дьоһуннааҕы кэпсэтии, аһаҕас кылаас чааһын, маастар кылааһы ыыттылар, аһаҕас кэпсэтиигэ уопсай үөрэхтээһин тэрилтэлэригэр оҕону иитии, үөрэтии үлэтин сүрүннүүр Судаарыстыбыннай сокуоннары, бырагыраамалары тус билиилэрин, сатабылларын көрдөрдүлэр. Күөн күрэс кэмигэр кылаас салайааччыларыгар форсайт-сиэссийэ буолла. Биһиги оскуолабыттан Мэҥэ-Хаҥалас үөрэнээччитин күннүгүн ааптардара Семенова Марфа Николаевна, Новгородова Марфа Еримеевна, Старостина Ольга Петровна, Уваровская Марфа Николаевна, Петрова Дария Петровна, Дмитриева Саргылана Михайловна буолаллар. Кылаас салайааччылара күннүгүнэн улуус таһымыгар инникитин буолуохтаах бырайыактары оҥорон көмүскээтилэр.
Дьүүллүүр сүбэҕэ үлэлээтилэр:
— Толстяков Гаврил Николаевич, Мэҥэ Хаҥалас улууһун үөрэҕириигэ салалтатын начальнига;
— Петров Михаил Васильевич, Мэҥэ Хаҥалас улууһун үөрэҕириигэ салалтатын начальнигын солбуйааччыта;
— Птицына Матрена Васильевна, “Кэскил” психолого-педагогическай киин дириэктэрэ;
-Тарасов Николай Петрович, иитии уонна эбии үөрэхтээһин отдел сүрүн специалиһа
-Павлова Мария Гаврильевна, Е.Д.Кычкин аатынан Матта орто оскуолатын дириэктэри иитэр уонна үөрэтэр үлэ солбуйааччыта;
-Афанасьева Маргарита Климентьевна, В.П.Ларионов аатынан Майа орто оскуолатын дириэктэри иитэр үлэҕэ солбуйааччыта;
-Васильева Октябрина Егоровна, Д. С. Федоров-Дмитрий Таас аатынан Хорообут орто оскуолатын дириэктэри иитэр уонна үөрэтэр үлэ солбуйааччыта;
-Петухова Анна Александровна, В.П.Ларионов аатынан Майа орто оскуолатын дириэктэри үөрэтэр үлэҕэ солбуйааччыта, өрөспүүбүлүкэтээҕи «Кылаас салайааччыта-2022” күөн күрэс муҥутуур кыайыылааҕа;
-Попова Айна Кимовна, М.Е.Попов аатынан Аллараа Бэстээх оскуолатын дириэктэри иитэр уонна үөрэтэр үлэ солбуйааччыта.
В.П. Ларионов аатынан Майа орто оскуолатыттан 10 «б» кылааһын салайааччыта, история уонна обществознание учуутала Иннокентий Владимирович Кондаков кыттан Лауреат үрдүк аатын ылла. Иннокентий Владимирович күөн күрэс уонна кылаас салайааччытын быһыытынан үлэтин туһунан бу курдук санаатын үллэстэр:
— Мин 2019 сыллаахтан кылаас салайааччытынан үлэлиибин. Кылааһым оҕолоро 10 кылаас буоллулар. Биһиги кылааспытынан дебатынан дьарыктанабыт. КВН-ҥа оонньуур оҕолор бааллар. Уоллаттарым спордунан уонна IT хайысханан, кыргыттарым ырыа куруһуогар сылдьаллар.
Барыта 12 кыттааччы кытынна. Түөрт түһүмэхтээх ааста. Бэйэм ордук сөбүлээбит түһүмэҕим боппуруостарга хоруйдааһын этэ. Тута эйиэхэ ыйытыы биэрэллэр, онно хоруйдаан иһэҕин.
Маннык таһымнаах күөн күрэскэ кыттар олус эппиэтинэстээх уонна долгутуулаах. Кыттааччылар бука бары уопуттаах, бииртэн биир чаҕылхай педагогтар буолан тэрээһин олус тыҥааһыннаахтык, интэриэһинэйдик ааста. Улуустааҕы үөрэх салалтатыгар, оскуолам кэлэктиибигэр, өйөөбүт хамаандабар махталбын тиэрдэбин.
Интервью ыллылар: Сандаара Скрябина,
Сандаара Тихонова, «Мэҥэбил» пресс-киин.
