Майаҕа ахсынньы 3 күнүгэр Арассыыйаҕа Учуутал уонна настаабынньык, Саха Өрөспүүбүлүкэтигэр Үлэ сылларын чэрчитинэн «Дьол түһүлгэтэ» уопсастыбаннай кииҥҥэ «Махтал эйиэхэ – үлэһит киһиэхэ!» диэн истиҥ-иһирэх көрсүһүү буолан ааста.
Манна Татьяна Петровна Попова салайааччылаах Майатааҕы уһуйааннар түмсүүлэрин сүбэтин көҕүлээһининэн уһуйааҥҥа өр кэмнэргэ үлэлии сылдьыбыт техүлэһиттэри чиэстээһин буолла. Оҕо иитиитин тэрилтэтигэр туох баар сатабылларын биэрэн, хас биирдии кырачааҥҥа тапталларын анаан үтүө суобастаахтык үлэлээбит, ыраас, сылаас дьиэнэн, минньигэс аһынан хааччыйбыт бэтэрээннэргэ махтал тыл үтүөтэ ананна. Билигин үлэлии сылдьар уһуйаан сэбиэдиссэйдэрэ Екатерина Петровна Романова (“Кэнчээри”), Галина Валерьевна Захарова (“Чуораанчык”), Альбина Романовна Захарова (“Сардаана”), Виктория Егоровна Бурнашева (“Мичил”) бэтэрээннэргэ улуус баһылыгын Махтал суругун, үөрэх управлениетын грамотатын, тэрилтэ аатыттан Бочуотунай грамота, Махтал сурук туттардылар. Итини сэргэ, бэтэрээннэр уһуйааннар түмсүүлэрин сүбэтин аатыттан сувенир, Махтал сурук туттулар.
«Чуораанчык» уһуйаан эдэр үлэһиттэрэ бэртээхэй турецкай үҥкүүнэн бырааһынньыгы киэргэттилэр, үөрүүнү бэлэхтээтилэр. Дьоро киэһэни Инна Николаевна Николаева, Антонина Николаевна Петрова иилээн-саҕалаан үрдүк таһымнаахтык ыыттылар. Кинилэр араас көрүдьүөс да, өй да оонньууларын сэргэхтик тэрийдилэр, хомоҕой хоһооннорун ааҕан кэлбит дьону ис туруктарын көтөҕөн сэргэхситтилэр. Уһуйаан бэтэрээннэрэ оонньоон-көрүлээн, бириис эгэлгэтин тутан үөрдүлэр-көттүлэр.
Уһун кэмҥэ биир уһуйааҥҥа ханна да халбарыйбакка 40-тан тахса сыл бэриниилээхтик оҕо иитиитигэр сыраларын-кыахтарын биэрэн үлэлээбит, билигин бочуоттаах сынньалаҥҥа олорор бэтэрээннэр Мавра Степановна Романова, Елена Петровна Абрамова, Валентина Алексеевна Старостина, Зинаида Дмитриевна Маркова, Любовь Семёновна Афанасьева, о.д.а. үтүө суобастаахтык үлэлээн-хамсаан ааспыттара. Кинилэр төһө да сынньалаҥҥа олордоллор билигин да олох үөһүгэр сылдьаллар. Барыга көхтөөх бэтэрээннэр фольклор түмсүүлэригэр, иис, үҥкүү, о.д.а. куруһуоктарга утумнаахтык дьарыктаналлар, сэлиэнньэ, улуус, өрөспүүбүүлүкэ ыытар тэрээһиннэригэр ыччаттары көҕүлээн инники күөҥҥэ сылдьаллар.
Күндү дьоммутугар чэгиэн доруобуйаны, үгүс үтүмэн ситиһиилэри, нус-хас олоҕу, эйэлээх халлааны баҕарабыт.
Тэрийээччилэр «Саха» көрдөрөр-иһитиннэрэр хампаанньа успуонсардаан көмөлөспүтүгэр махталларын тиэрдэллэр.
Марелла Баишева.
