Ахсынньы 23 күнүгэр Мэҥэ Хаҥалас улууһун Майа сэлиэнньэтигэр дуобат-саахымат киинигэр «Кыталыкка» нуучча дуобатыгар биирдиилээн бастыыр иһин улуус чөмпүйэнээтэ буолан ааста.
Үөрүүлээх күрэҕи киэн туттар, ытыктыыр тириэньэрбит Василий Васильевич Куприянов, кылаабынай судьуйа Павел Николаевич Скрябин эҕэрдэлээн арыйдылар.
Эр дьоҥҥо 41 кыттааччы кэлэн швейцарскай систиэмэнэн леталка-микроматч оонньонно. 9 тууртан 9 очкону ылан, Василий Васильевич үөрэнээччитэ Проня Говоров эрэллээхтик бастаата. 2 миэстэ Василий Куприянов, 3-с Петр Аргунов, 4-с Савва Аргунов, 5-с Афанасий Павлов, 6-с Сандал Стручков, 7-с Павел Скрябин, 8-с Гаврил Стручков, 9-с миэстэни Арсен Иванов үллэһиннилэр.
Дьахталларга 14 кыттааччыга эргимтэ систиэмэнэн леталка-микроматч ыытылынна. Түмүккэ: 1миэстэни Анна Шишигина, 2-һи Ньургуйаана Иванова, 3-һү Настя Стручкова, 4-с Павлина Дорофеева, 5-с Ангелина Андреева, 6-с Евдокия Ноговицына, 7-с Алина Степанова, 8-с Александра Филиппова, 9-с Саргылана Ильина буоллулар.
Кыайыылаахтар грамотанан, мэтээлинэн уонна Василий Васильевич Куприянов бэйэтэ уу харчынан туруорбут 100 тыһыынча солкуобайынан 1-9 миэстэҕэ диэри наҕараадаланнылар. Улуус дуобакка федерациятын бэрэсэдээтэлэ Юрий Николаевич Колмаков туруорбут сыаналаах сэртипикээттэринэн бэтэрээннэр бириистэннилэр.
Бу курдук дуобат сайдарын туһугар сүүрэ-көтө, үлэлии сылдьар тириэньэрдэрбитигэр, куруутун күүс-көмө буолар дуобатчыттарбытыгар Ньургуйаана Семеновна Ивановаҕа, Павел Николаевич Скрябиҥҥэ, Петр Владимирович Аргуновка, Афанасий Афанасьевич Павловка уонна, чуолаан, дуобаты өрө туппут убаастыыр тириэньэрбитигэр Василий Васильевич Куприяновка улахан махталбытын тиэрдэбит!
Инникитин да улууспутугар дуобат успуорда күүскэ сайдыа диэн бигэ эрэллээхпит.
