Святослав ДОКТОРОВ, СӨ үтүөлээх тутааччыта, Майа сэлиэнньэтин, Мэҥэ Хаҥалас улууһун Бочуоттаах гражданина.
Тутуу барар сиригэр дьон олохсуйан олох сайдар, киэркэйэр. Сыллата Саха сиригэр аныгы олох ирдэбилигэр толору эппиэттиир үөрэҕирии, доруобуйа харыстыбылын, култуура, успуорт о.д.а эбийиэктэрэ тутуллан үлэҕэ киллэриллэллэр. Социальнай эбийиэктэри сэргэ олорор дьиэни-уоту тутуу тэҥҥэ тутуллан нэһилиэнньэ олоҕун уйгута тупсар.
Өрөспүүбүлүкэбитигэр, ол иһигэр биһиги Мэҥэ Хаҥалас улууһугар РФ Бэрэсидьиэнэ Владимир Путин көҕүлээһининэн ылыныллыбыт “Олорор дьиэ уонна куорат эйгэтэ” национальнай бырайыак чэрчитинэн үлэлиир «2019 ‒ 2025 сс. хаарбах дьиэттэн дьону көһөрүү” бырагырааманан кэнники сылларга үгүс тутуу барбытын бары көрө-истэ, билэ сылдьабыт. Куораттар эрэ буолбакка, тыа сирин улуустарын олохтоохторо толору хааччыллыылаах таас дьиэлэргэ саҥа кыбартыыраларга көһүүлэрэ олох хаачыстыбатын тупсан, үрдээн иһэрин туоһулуур.
Киһи үөрэрэ, астынара баар ‒ бу бырагырааманы Владимир Путин салгыы үлэлэтэн 2030 сылга диэри 2023 сыл балаҕан ыйын 1 күнүгэр диэри хаарбаҕынан билиниллибит мас дьиэни барытын көһөрөр соругу туруоруута. Итинэн сиэттэрэн 2030 сылга диэри Саха сиригэр олорор дьиэни тутуу 1,5 төгүл улаатыахтаах.
Бүгүн Владимир Путин Федеральнай Мунньахха Анал этиитэ дойдубут 2030 сылга диэри инники сайдыытыгар туһуланна. Киэҥ ис хоһоонноох этии оҥоһулунна. Олох сүрүн салаалара барылара хабылыннылар. Дьиэ кэргэни өйөөһүнтэн саҕалаан дойду эрэгийиэннэрин сайыннарыыга тиийэ соруктар чопчуланнылар. Анал этии туһаайыылара бары олоххо киирэллэригэр эрэнэбит.