Доллу нэһилиэгэр бырабыыталыстыба отчуотун истэ 52 киһи кэллэ. Нэһилиэк баһылыга Николай Сивцев бөлөх састаабыгар киирэн отчуоттуу кэлбит салайааччылары билиһиннэрдэ уонна мунньаҕы салайан ыытта.
Ааспыт сылга ыытыллыбыт үлэ туһунан иһитиннэрии кэнниттэн олохтоохтор ыйытыыларга, этиилэргэ киирдилэр. Семен Десяткин нэһилиэккэ дьон ахсаана эбиллэ турарынан оскуолаҕа эбии тутуу наадатын, Тарас Десяткин төрөөбүтэ 100 сыллаах үбүлүөйүн көрсө туох үлэ барарын, кини аатынан эбийиэк тутуута, уулуссатын аспааллааһын үлэтэ түөрт сыл иһигэр кыаллыа дуу диэн этиннэ.
Егор Титов сылгыны дьиэ таһыгар иитии туһунан сокуон биһиэхэ төһө сөптөөҕүн, тумуллар федеральнай суолга олороллорунан, сүөһүлэрин суолга үнтү көттөхтөрүнэ, массыына харчытын сүөһү хаһаайыныттан төлөтөр сокуону уларытыахха сөп дуо диэн туоһуласта.
Надежда Птицына гаастаах дьонтон көрүүгэ-истиигэ (обслуживание) диэн наһаа элбэх харчыны ылалларын, тугу да гыммакка, харахтарынан көрбүттэригэр саатар 500 солкуобай сөп буолбат дуо диэн ыйытык туруорда.
Нэһилиэк олохтоохторо «Сосновканы» тоҕо үлэлэппэттэрин, оройуонтан барбыт анал байыаннай дьайыы кыттыылаахтарыгар туох көмө баарын ыйыталастылар.
Этии быһыытынан оскуолаҕа эбилик тутуу оннугар начаалынай оскуола тутар ордук, Төҥүлү балыыһатыгар массаас кэбиниэтин арыйыахха диэн туруорустулар.
Тумуллар бырабыыталыстыба үлэтин сүүс бырыһыан биһириибит диэтилэр.
Елизавета НЕУСТРОЕВА.
