Отчуот мунньаҕын нэһилиэк баһылыга Мирон Свинобоев салайан ыытта.
Бааһынай хаһаайыстыба салайааччыта Давид Гаврильев сылгы ахсааныгар көрүллүбүт көмө харчыны дьон санаатын учуоттаан туттуллар хайысхатын кэҥэппиттэригэр махтанна. Ол суотугар ааспыт сайын үчүгэйдик оттообуттар.
Бибилэтиэкэр Парасковья Местникова айылҕа уратылааҕынан сылгыны хаарчах иһигэр тутар саҥа федеральнай сокуону өссө ырыталларыгар көрдөстө. Учуутал Парасковья Макарова өрөспүүбүлүкэҕэ ас-үөл атыылыыр маҕаһыыннар сыаналара биллэрдик эбиллэрин, ону ким хонтуруоллуурун сураста.
Улуус ытык сүбэтин чилиэнэ Федот Богимов тыа хаһаайыстыбатын боппуруостарын көтөхтө. Тыа хаһаайыстыбатын кэлимник сайыннарыы бырагырааматын оҥорорго, нэһилиэк таһымыгар боломуочуйаны биэрэргэ, олохтоох дьаһалта нэһилиэккэ бэйэтэ бас билэр хотонноох буоларын ситиһэн нэһилиэнньэ аһын-үөлүн чэпчэки сыанаҕа туһанар кыахтаныан, түргэнник ситэр салааҕа болҕомто ууруллара наадатын, төрүт омук быһыытынан көмүскэллээх буолары, гаастааһын киириэ дуо, о.д.а. этиилэри оҥордо, суругунан туттарда.
Нэһилиэк баһылыга Мирон Свинобоев дьон олоҕун тупсарыыга үлэ көдьүүстээхтик барарын, нэһилиэнньэ 100 бырыһыан ититиигэ холбоммутун, нэһилиэккэ саҥа дьиэлэр тутуллалларын, социальнай эбийиэктэр бары саҥаларын, толору хааччыллыылаахтарын бэлиэтээн туран өрөспүүбүлүкэ сайдыытыгар кылааппытын киллэрэ туруохпут диэтэ уонна олохтоохтор ааттарыттан бырабыыталыстыба ыытар үлэтин биһирииллэрин биллэрдэ.
Түмүккэ үлэ дьонун бэлиэтиир үгэһинэн Петр Попов Үөрэҕирии министиэристибэтин Махтал суругун Үөрэҕирии систиэмэтигэр киллэрбит кылаатын уонна өр сыллаах үтүө суобастаах үлэтин иһин математика учуутала Марфа Пономареваҕа туттарда.
Отчуоту 41 киһи иһиттэ. Салгыы миниистир байыаннай дьайыыга сылдьар байыастар дьиэ кэргэттэрин кытта көрүстэ, кыһалҕаларын иһиттэ.
Марелла Баишева.
