Атырдьах ыйын 18‒20 күннэригэр Алдан улууһугар Томмот куоратыгар ахсыс төгүлүн ыытыллыбыт өрөспүүбүлүкэтээҕи «Доҕордоһуу биэрэгэ» бэстибээлгэ оҕолорбут ситиһиилээхтик кыттан кэллилэр.
85 кыттааччыттан оҕолорго бастакы истиэпэннээх лауреат буолары ситистилэр. Салайааччы Григорий Борисов. «Кэнчээри», «Добун» ВИА бөлөхтөр холбоһоннор 5 ырыаны тыыннаах доҕуһуолунан таһаардылар: «Частушка», инструменталка, «Мэник сулустар», «Билинии» Анна Бурнашева, «Ат таптала» курдук норуот ырыатын толордулар. Игорь Зыков бас гитараҕа, Күннээйэ Владимирова клавишаҕа, Лариса Саввина барабааҥҥа, хомуска, Виолетта Кузьмина соло гитараҕа, Дайаана Гаврильева бас гитараҕа, ритм гитараҕа, Дайаана Абрамова соло гитараҕа оонньоотулар.
Мэҥэ Хаҥалас улууһуттан улахан дьоҥҥо Гаврил Колесов‒Хардыы бастакы истиэпэннээх дипломант, «Айкуо» бөлөх бастакы истиэпэннээх лауреат, оттон Николай Куприянов Гран-при буолары ситистилэр.
Табаҕатааҕы оҕо ускуустубатын оскуолатын аатыттан салайааччыга, төрөппүттэргэ уонна Мэҥэ Хаҥалас култууратын салалтатыгар итии истиҥ эҕэрдэбитин уонна барҕа махталбытын тиэрдэбит.
Артур Кузьмин
—