Тойук дьиэрэйэр, талаан арыллар, олоҥхо дуорайар ыһыаҕа ‒ Хара нэһилиэгэр

Самаан сайыны айхаллыыр, уйгу быйаҥы олохтуур  Хара нэһилиэгин Арҕаа Куоҥ Харах алааһыгар өрөгөй үҥкүлүүр күнэ үүннэ, талаан арыллар кэмэ кэллэ, дьиэрэйэр тойуктаах үрүҥ тунах олоҥхо ыһыаҕа ыһылынна.

Дойдубутугар Дьиэ  кэргэн, Сахабыт сиригэр Оҕо саас, Хара нэһилиэгэр Олоҥхо сылларыгар аналлаах Мэҥэ Хаҥалас улууһугар ХII-с төгүлүн ыытыллар «Υйэлээҕи үксэтэр, кэскиллээҕи кэҥэтэр олоҥхо ыһыаҕын» үөрүүлээх арыллыытыгар, хатыҥ маһынан симэммит киин түһүлгэҕэ тобус-толору дьон тоҕуоруһа муһунна. «Оҕо Улуу Ньургун» олоҥхону тыыммакка да олорон, сэргии, кэрэхсии көрдө.

Олоҥхоһут, ССРС суруйааччыларын сойууһун чилиэнэ Николай Степанов-Ноорой «Оҕо Улуу Ньургун» олоҥхотуттан дьүһүйүүнү Гаврил Колесов аатынан «Олоҥхо дьиэтин» режиссера Ариан Пермяков туруорбут. Дьүһүйүүгэ Хара нэһилиэгин «Айыллаан» култуура киинин салайыытынан, нэһилиэк дьоно-сэргэтэ барыта оҕотуттан-эмэнигэр тиийэ түмсэн 150-ча киһи кытынна. Сүрүн оруолларга  Николай Васильев ‒ Оҕо Улуу Ньургун, Айталина Михайлова ‒ Айыы кыыһа, Станислав Иванов ‒ Ноорой, Аксинья Степанова ‒ Аан Алахчын Хотун, Сардаана Катаева ‒ Симэхсин эмээхсин, Лена Птицына ‒ Абааһы кыыһа, Афанасий Андреев, Улмас Федоров, Дмитрий Егоров ‒ Абааһы уолаттара, Павел Адамов, Ньургустана Дмитриева ‒ тойонноох хотун оруолларын итэҕэтиилээхтик оонньоон дьон кутун туттулар.

Ыһыах алгыһын сиэрин-туомун толорорго Хара нэһилиэгин тыа сирин түөлбэтин баһылыга Дария Назарова бар дьонун ортотугар ыһыах ытык дуоҕатын өрө анньан туруорда. Ол кэннэ уҥа өттүгэр арыалдьыт уолаттардаах, хаҥас диэки битииһит кыргыттардаах алгысчыт Виталий Очиров-Алгыс Ачыырап киирэн, олоҥхо ыһыаҕын алгыһын түһэрдэ. Салгыы күн дьөһөгөйгө сүгүрүйүү сиэрэ-туома ыытылынна. Николай Степанов-Ноорой сиэнэ Аксинья Степанова тохтор кылыһахтаах оһуокайа  элбэх дьону түмэ тардан, ыһыах сиэрэ-туома толору ситтэ.

Дьоро түһүлгэҕэ улуус баһылыга Дмитрий Тихонов, Хара нэһилиэгин тыа сирин баһылыга Дария Назарова, норуот дьокутаата «Саха» НКИХ генеральнай дириэктэрэ Олег Марков эҕэрдэ тыл эттилэр.

Омурҕан кэннэ саха төрүт көрүҥнэригэр спортивнай күрэхтэһиилэр, саха мааны таҥаһыгар, оһуокайга, саха норуотун уус-уран айымньыларыгар куонкурстар, бөҕөстөр, быһыйдар күөн көрсөр түһүлгэлэрэ ыытылынна.

«Ойор күннээх Орто дойдуну хоһуйдахпыт буоллун» диэн ааттаах олоҥхону биирдиилээн уонна бөлөҕүнэн толорууга икки күн олоонноон олорон олоҥхону иһиттилэр.

Елизавета Неустроева

Ыһыах түгэннэриттэн хаартыскалар ‒ Иван Лукин түһэриитэ