Олохтоох көҕүлээһини өйүүр бырагыраама
1-кы Наахара нэһилиэгэ иккис сылын олохтоох көҕүлээһини өйүүр бырагыраамаҕа кыттан быйыл сайын сайыҥҥы уу турбатын тардан үлэҕэ киллэрдэ.
Бастакы сыл уу турбалара, мотуор атыылаһыллыбыт. Быйыл ‒ иккис сылыгар турба тардыллан холбонор кыахтанна.
Сайын кураан дьыл туран уу боппуруоһа сытыытык турбута. Нэһилиэги биир водовоз массыына хааччыйара. «Эгопласт» тэрилтэ кэлэн кэмигэр уу турбатын холбоон үлэҕэ киллэрэн нэһилиэнньэ олус абыранна. Ууну ыларга Уһун Күөл диэн ааттаах сылын аайы үрэҕи кытта силбэһэн уолан хаалар күөлбүтүн субуотунньуктаан, быһыттаан туһанныбыт. Олохтоох ыччаппыт Виталий Степанов быһыты көрүүгэ-истиигэ быйыл сайын үлэлээтэ. Бөҕөргөтүүтүн сотору-сотору астаран биэрэн истэ, онон быһыппыт ууну ыыппакка тутан турда.
Уу ‒ тыын боппуруос. Хас эмэ сыл кыайтарбакка турар боппуруоспут быһаарыллан, нэһилиэк дьоно-үөрэ-көтө туһанна, махталлара улахан. Оҥоһуллубут бырайыакпытыгар харыстабыллаахтык сыһыаннаһан өр сылларга үлэлии турарыгар баҕарабыт. Нэһилиэк хаһаайкалара аны сайыны кэтэһэн, эһиил өлгөм үүнүүнү ылыахпыт диэн былааннаналлар. Тыа сирэ сайдыытыгар маннык бырагыраамалар үлэлииллэрэ олус туһалаах диэн бэлиэтиэхпитин баҕарабыт.
Сардаана Сергеева. Тиэлиги
