Алтынньы 6‒17 күннэригэр Төҥүлү нэһилиэгэр Аҕам саастаахтар дэкээдэлэрэ бэрт сэргэхтик, элбэх киһини хабан, нэһилиэк иһинээҕи бары тэрилтэлэр кыттыһан ыытылынна.
Дэкээдэни ыытарга ылыллыбыт былаан барыта туолла. Алтынньы 6 күнүгэр улуустааҕы уус-уран көрүү ‒ Аҕам саастаахтар бэстибээллэриттэн саҕаламмыта. Манна балаһыанньа быһыытынан 7 ирдэнэр нүөмэри бэлэмнээн кытынныбыт. Түөрт нүөмэр лауреат, үс нүөмэр дипломант буолан сүргэбит көтөҕүлүннэ.
Дэкээдэ чэрчитинэн 8 тыыл уонна 36 сэрии сылын оҕолоругар биир кэмнээх көмө оҥоһулунна. Манна нэһилиэк иһинээҕи тэрилтэлэр уонна чааһынай тэрилтэлэр көмөлөрүн бэлиэтиир тоҕоостоох. Нэһилиэк мусуойа «Аһаҕас аан» күннэрин ыытта. Элбэх киһи Төҥүлү устуоруйатын билистилэр, саҥа оҥоһуллубут истиэндэлэри сэргии көрдүлэр.
Өрөспүүбүлүкэҕэ биллэр-көстөр спортсмен, спортивнай комментатор И.И.Скрябин таҥан оҥорбут викторинатын ситим нөҥүө тарҕаппыта. Онно 15 ыйытыктан 13гэр таба эппиэти биэрбит Кузьма Борисов кыайыылааҕынан бэлиэтэннэ.
Дэкээдэ устата чэпчэтиилээх баттах кырыйыытыгар өҥө оҥоһулунна. Үс парикмахерга 30-тан тахса киһи өҥөнөн туһанна.
Алтынньы 14 күнүгэр сарсыардаттан лиссиэй успуорт саалатыгар «Көрдөөх стартарга» 10-нуу киһилээх 4 хамаанда илин-кэлин түһүстүлэр. Саамай түмсүүлээх, кыайыыга дьулуурдаах «Эбэ» хамаанда бастакы, «Аартык» иккис, «Саһарҕа+Дьүөдэ» хамаандалар үһүс, төрдүс миэстэҕэ «Төҥүлү» хамаандата таҕыста. Кыайыылаахтар мэтээлинэн уонна грамотанан бэлиэтэнэн, үөрэн-көтөн тарҕастылар. Күрэхтэһиини Дмитрий Васильев судьуйалаан, Илья Скрябин комментатордаан сүрдээх сэргэхтик уонна таһаарыылаахтык ыыттылар.
Декада түмүктүүр ,,Сандалы тула мустан сэһэргэһиэх» тэрээһин алтынньы 17 күнүгэр, ,,Эйгэ»СКК буолла. Манна сааланы толору ытык-мааны аҕам саастаах дьоммут мустубуттара сүргэни көтөхтө. Бу тэрээһин юбилярдары эҕэрдэлээһинтэн саҕаланна. Нэһилиэк баһылыга Эверстов Петр Васильевич, ,,Алаһа» кырдьаҕастар сэбиэттэриттэн Иванова Матрена Васильевна эҕэрдэ суруктары уонна өйдөбүнньүк бэлэхтэри туттардылар. Физкультурнай хамсааһын 100 сылынан улуустааҕы ,,Урожай» общество бэрэсэдээтэлэ Пестряков Виталий Михайлович эдэр сылдьан, элбэх көлөһүннэрин тохпут, нэһилиэктэрин, улуустарын чиэһин көмүскээбит спорт ветераннарыгар улуус Бочуотунай грамоталарын, Куприянова Алиса Ивановна нэһилиэк Махтал суруктарын туттардылар.
Байыаннай дьайыыга сылдьааччыларга таҥас-сап тигиитигэр, «Илии сылааһа» аахсыйаҕа ис сүрэхтэриттэн кыттыбыт бэтэрээннэргэ улуус грамотатын 4, нэһилиэк грамотатын 9 киһиэхэ махтал тыллардаах баһылык Петр Эверстов туттарда.
Эҕэрдэ ырыа-тойук, араас оонньуулар, урукку, эдэр саастарын муусукатынан үҥкүү, ирэ-хоро кэпсэтии, истиҥ көрсүһүүлэр хойукка диэри бардылар…
Дэкээдэ таһаарыылаахтык ыытылларыгар күүс-көмө буолбут дьоммутугар-сэргэбитигэр, чуолаан олохтоох дьаһалтаҕа, баһылык Петр Эверстовка, баһылыгы солбуйааччы Степан Заровняевка, нэһилиэк бары тэрилтэлэрин салайааччыларыгар, чааһынай тэрилтэлэр салайааччыларыгар, ,,Эйгэ» СКК кэлэктиибигэр, салайааччы Александра Баишева, Р.Г.Десяткин аатынан успуорт комплекс кэлэктиибигэр, дириэктэр Алиса Куприянова, нэһилиэк музейын үлэһитигэр Тарабукин Иван Николаевичка, нэһилиэк социальнай үлэһитигэр Клавдия Николаеваҕа, түөлбэ салайааччыларыгар Надежда Заровняеваҕа, Изабелла Степановаҕа, Екатерина Михайловаҕа, Марфа Сидороваҕа, биирдиилээн көмөлөспүт Илья Скрябиҥҥэ, Лариса Говороваҕа, Ольга Шелковниковаҕа, Анна Львоваҕа «Алаһа» бэтэрээннэр сэбиэттэрин аатыттан истиҥ махталбытын тиэрдэбит. Бары үтүөнү, үлэҕитигэр ситиһиилэри баҕарабыт. Инникитин да бииргэ үлэлиэхпит диэн эрэллээхпит.
«Алаһа» бэтэрээннэр сэбиэттэрэ.
