Олунньу 14 күнүгэр Дьаҥхаады нэһилиэгэр СӨ бырабыыталыстыбатын оробуочай бөлөҕүн 55 киһи көрүстэ. Баһылык Василий Стручков мунньаҕы иилээн-саҕалаан ыытта.
Отчуоту истии кэннэ ыйытыыларга, этиилэргэ киирдилэр. Михаил Макаров бэйдиэ сылдьар ыттарга, ыты иитиигэ туох миэрэлэр баалларын, былыргы, быраҕыллыбыт дьиэлэри көтүрүү, ол сирдэри ыраастаан дьоҥҥо уһаайбалары биэрии төһө кыалларын, Лия Санникова дьон иһэр уутун ким да бэрэбиэркэлээбэт, нэһилиэнньэлээх пууннарга иһэр ууну ыраастыыр ыстаансыйалары туруоруу туһунан, Анна Винокурова инбэлииттэр дьиэ ылалларыгар туох көмө көрүллэрин, түөлбэ олоҕун сайыннарыыга үбүлээһин баар буолуон сөп дуо диэн ыйыталастылар. Олохтоохтор үүт, эт туттарыллар сыанатын тоҕо үрдэппэттэрин, кыбартыыра сыаната үрдүү турара хонтуруолланыытын туоһуластылар.
Санаа үллэстиитгэр өрөспүүбүлүкэ нэһилиэнньэтин ахсаана кэлии үлэһиттэр гражданство ыланнар үрдээтэ, бары дьиэ кэргэнинэн көһөн кэлэн, босуобуйанан, ийэ хапытаалынан кытта туһаналлар буолуохтаах, кинилэр үлэлии эрэ кэлэллэрин олохтуохха, маны хонтуруоллуохха наада диэн этии киирдэ.
Никита Шарин магистральнай турбанан гаас кэлэрин кэтэһэллэрин этэн туран, быйылгы отчуоттан астынным, чыҥха атын кэпсэтии буолла диэн сыаналаата.
Отчуокка дьон туруорсубут боппуруостара, этиилэрэ барыта боротокуолга киирдилэр.
Төхтүрдэр бырабыыталыстыба үлэтин биһириибит диэн куоластаатылар.
Елизавета НЕУСТРОЕВА.
