Тараттар оскуола-саад, биэлсэр-акушер пууна тутулларын күүтэллэр

Олунньу 14 күнүгэр Саха Өрөспүүбүлүкэтин бырабыыталыстыбатын иккис бөлөҕө 2023 сыллаах үлэ отчуотун туруорар мунньаҕа Араҥас нэһилиэгиттэн саҕаланна. Мунньаҕы нэһилиэк баһылыга Андрей Кычкин иилээн-саҕалаан ыытта.

Ааспыт сылга нэһилиэнньэттэн 2 боппуруос киирбититтэн 1 боппуруос үлэҕэ киирбит.

Олохтоохтор сүрүннээн нэһилиэк дьонун уопсай кыһалҕатын таарыйар ыйытыылары биэрдилэр: оскуола тутуута (60 уонна 30 миэстэлээх оскуола-саад диэн тутуллуохтаах этэ); нэһилиэккэ биэлсэр суоҕа, биэлсэр-акушер пуунун тутуута; сыыр быара хайдыыта, сыырга тахсар суол алдьанан, дьиэлэргэ чугаһаабыт; хочуолунайдар гааска көһүүлэрэ; сайылыкка уот холбооһуна.

Араҥас нэһилиэгин олохтооҕо, кэпэрэтиип салайааччыта Петр Петров кэпэрээссийэни сайыннарар буоллахха ыччаттарбыт тыа сиригэр хаалалларын ситиһиэххэ, Арассыыйа үрдүнэн ыытыллар демографическай бэлиитикэ бу биир киһи быһаарыыта буолбатах, боппуруоһу кэлимник көрөн ыччаттарга усулуобуйа тэрийэргэ үлэлиэхпитин наада диэн эттэ.

Отчуоту 43 киһи иһиттэ. Кинилэр бырабыыталыстыба үлэтин биһириибит диэн сыаналаатылар.

 

Елизавета НЕУСТРОЕВА.