Тохсунньу 29 күнүгэр улуус баһылыга Дмитрий Тихонов 2023 сыллаах үлэтин отчуотун Араҥас нэһилиэгэр туруорда. Манна Ил Түмэн докутаата, сир баайыгар уонна айылҕа боппуруостарыгар сис кэмитиэт бэрэссэдээтэлэ Андрей Находкин, улуус дьокутааттарын сэбиэтин бэрэссэдээтэлэ Иннокентий Андросов, управлениелар, тэрилтэлэр салайааччылара кыттыыны ыллылар. Мунньаҕы нэһилиэк баһылыга Андрей Кычкин иилээн-саҕалаан ыытта.
Ааспыт сылга нэһилиэнньэттэн 8 боппуруос турбутуттан 5 хонтуруолга ылыллан үлэҕэ киирбит. Олохтоохтор сүрүннээн нэһилиэк дьонун уопсай кыһалҕатын таарыйар 20 ыйытыыны биэрэн хоруйдары ыллылар. Кулууп тех. үлэһитэ Александра Кычкина мед. үлэһит тиийбэтиттэн, суол алдьаныытыгар ыарахаттары көрсөбүт, биэлсэр пуун тэриллэрэ буоллар диэн баҕа санаатын эттэ. Төҥүлүтээҕи балыыһа кылаабынай бырааһа Светлана Петрова хас сэрэдэ ахсын Тарат олохтоохторун кэлэн көрөллөрүн, Төҥүлү сытар балыыһатыгар стационарга кими да аккаастаабакка эмтииллэрин эттэ. Култуура киинин дириэктэрэ Михаил Цыпандин кыра кулууптарга материальнай бөҕөргөтүү тиийбэт, казеннай буолан өрөспүүбүлүкэ ыытар күрэхтэригэр кыттар көҥүллэммэт диэн этиитигэр, социальнай боппуруоска баһылыгы солбуйааччы Октябрина Кулешева НКО тэринэн, бүддьүөккэ үөрэҕирии уонна успуорт хайысхатыгар граннарга кыттыаҕыҥ диэн ыҥырда. Лидия Николаева байыаннай дьайыыга сылдьар уолаттарбытыгар анаан 500 тахса таҥаһы тигэн ыыттыбыт диэн иһитиннэрдэ. Салгыы үлэҕэ промышленнай оберлог баара буоллар, иистэнэр массыыналарбыт элбэх үлэни тулуйбаттар диэн баҕа санаатын үллэһиннэ. Кэпэрэтиип салайааччыта Петр Петров иккис хотон туттарарга үлэлэһэ сылдьарын эттэ. Кэпэрэтиип былаанын 100 бырыһыан толорон олороллорун, оттуур сир, бары усулуобуйа баарын ыйда. Кэпэрэтииптэр дохуокка тахсалларыгар анал систиэмэтэ толкуйдуохха диэн этии киллэрдэ. 44 киһи отчуоту иһиттэ. Баһылык отчуотун үчүгэйинэн сыаналаатылар.
Елизавета НЕУСТРОЕВА.
