Саҥа сылы көрсө үгүс маҕаһыыннар сүүйүүлээх лотерея ыытар үгэстээхтэр. Майаҕа успуорт тэрилин атыылыыр “Талер” маҕаһыын атыылаһааччыларыгар эмиэ лотерея бэлэх уунна. Маҕаһыын хаһаайына Дмитрий Катакинов маннык бэлэҕин Майа олохтоохторун сэргэ улуус нэһилиэктэриттэн туттулар.
Лотерея тохсунньу 8 күнүгэр маҕаһыыҥҥа үрдүттэн оонньоммута. Маны арчыһыт Зиновий Игнатьев иилээн-саҕалаан ыыппыта. Ол түмүгүнэн Наталья Олесова, Аркадий Уваровскай, Мария Бекетова, Валентина Трофимова, Наталья Иванова, Михаил Шарин, Матрена Заровняева, Юрий Петров, Иван Пивоваров, Надежда Афанасьева, Егор Соловьев, Антонина Кардашевская, о.д.а. сыаналаах бириистэри тутан үөрүүлэрэ муҥура суох.
“Талер” маҕаһыын салайааччыта Дмитрий Исакович Катакинов саҥа үүммүт сылга дьонугар-сэргэтигэр чэгиэн туругу, тус олохторугар дьолу-соргуну, үлэҕэ-хамнаска үрдүк ситиһиилэри, этэҥҥэ буолууну баҕарар.
“Талер” маҕаһыын 2010 сылтан таһаарыылаахтык үлэлиир. Манна атыылаһааччы сөбүлээн сылдьар. Маҕаһыыҥҥа успуорт тэрилин таһынан хаһаайыстыбаннай табаар, таҥас-сап кытта атыыланар. Дмитрий Катакинов Майа сэлиэнньэтигэр ыытыллар бары тэрээһиннэргэ мэлдьи успуонсар быһыытынан көхтөөхтүк кыттан кэллэ. 2023 сыл түмүгүнэн “Бастыҥ урбаанньыт” анал аат 5 бастыҥнарын иһигэр ааттаммыта. Маны сэргэ, улууспут “Эркээйи” хаһыатыгар сыллата биирдиилээн ыалга сурутуу бэлэхтиир үтүө үгэстээх. Быйылгы сылга Дмитрий, Екатерина Катакиновтар сурутууларын анал байыаннай дьайыы кыттыылааҕын дьиэ кэргэнигэр анаатылар.
Түгэнинэн туһанан, эрэдээксийэ кэлэктиибин аатыттан Катакиновтар дьиэ кэргэҥҥэ бары үтүөнү-кэрэни, үлэлэригэр үрдүктэн үрдүк ситиһиилэри баҕаран туран бииргэ үлэлэһэллэригэр махталбытын тиэрдэбит.
Марелла Баишева.
