Биллиилээх чабырҕахсыт Мария Герасимова – Сэҥээрэ аатынан “Чараас сытыы тыллаах чабырҕахпыт чаҥыйдын” диэн чабырҕаҕы толорооччулар аһаҕас өрөспүүбүлүкэтээҕи күөн күрэстэрэ Чурапчы улууһун «Айылгы» норуот айымньытын дьиэтигэр бэрт сэргэхтик ааста.
Куонкуруска норуот тылынан уус-уран айымньытын толорооччулар Чурапчыттан, Тааттаттан, Амматтан, Мэҥэ Хаҥаластан (Балыктаахтан, Тиэлигиттэн, Бүтэйдээхтэн) кэлэн күөн көрүстүлэр. Көрүү оҕолорго, улахан дьоҥҥо, биирдиилээн, бөлөҕүнэн толорооччуларга диэн бөлөхтөрүнэн арахсан ыытылынна.
Өрөспүүбүлүкэтээҕи аһаҕас күрэс түмүгүнэн Кылаан кыайыылааҕынан Тиэлигиттэн «Билбит-көрбүт» бөлөх тахсан бастыҥ чабырҕахсыттарынан ааттаннылар итиэннэ сүрүн, харчынан бирииһи туттулар. Бүтэйдээхтэн Прокопьевтар дьиэ кэргэн кыттан бастакы истиэпэннээх лауреат буолары ситистилэр.
Дьүүллүүр сүбэҕэ: Мария Андреевна Герасимова – Сэҥээрэ, Александра Николаевна Васильева, Мария Гаврильевна Боппоенова үлэлээтилэр.
Биир дойдулаахтарбытын ситиһиилэринэн итиитик-истиҥник эҕэрдэлиибит!
