Олунньу 24 күнүгэр Д.Ф.Ходулов аатынан култуура киинигэр «Сүр көтөҕүү – 2024» өрөспүүбүлүкэтээҕи көрүү-күрэх 11-с төгүлүн ыытылынна.
Тэрээһини алгыс тылынан улуустааҕы култуура уонна духуобунай сайдыы управлениетын исписэлииһэ Спиридон Григорьев саҕалаата.
«Сүр көтөҕүү» бырайыак ааптара, «Душа России» национальнай бириэмийэ лауреата, РФ уонна СӨ култууратын үтүөлээх үлэһитэ Василий Павлович Винокуров – Кыталык Баһылай ыллыктаах тылын эппитин кэннэ уолаттар бары флешмобка үҥкүүлээтилэр, күпсүүрдээх уолаттар доҕуһуоллаатылар.
«Кыталык» үҥкүү норуодунай ансаамбыл 45 сылынан, култуура көҕүлээһиннэрин өйүүр Бэрэсидьиэн пуондатын өйөбүлүнэн ыытыллар, 11-с төгүлүн биһигини кэрэхсэтэр «Сүр көтөҕүү» көрүү-күрэх кыттыылаахтарын дьүүллүүр сүбэтигэр: А.Д.Макарова аатынан Дьокуускайдааҕы култуура уонна ускуустуба коллеһын үҥкүү салаатын сэбиэдиссэйэ, уһуйааччыта, СӨ култууратын үтүөлээх үлэһитэ Станислав Степанов, улуустааҕы култуура уонна духуобунай сайдыы управлениетын салайааччытын солбуйааччы Александр Кулешов, Сергей Зверев-Кыыл Уола аатынан СӨ үҥкүү норуодунай тыйаатырын педагог-балетмейстера, СӨ култууратын үтүөлээх үлэһитэ Юрий Федоров, Норуот айымньытын уонна социальнай-култуурунай технологиялар өрөспүүбүлүкэтээҕи дьиэтин исписэлииһэ, РФ уопсай үөрэхтээһинин бочуоттаах үлэһитэ, СӨ култууратын, үөрэхтээһинин, ыччат бэлиитикэтин туйгуна Николай Терютин уонна Василий Павлович Винокуров – Кыталык Баһылай киирдилэр.
Көрүү-күрэххэ Горнайтан, УусАлдантан, Ньурбаттан, Амматтан, Намтан, Кэбээйиттэн, Бүлүүттэн, Тааттаттан, Мэҥэ Хаҥаластан уонна Дьокуускай куораттан уопсайа 368 уол кыттыыны ылла.
