Анал байыаннай дьайыыга кытта сылдьар биир дойдулаахтарбытыгар кыһыҥҥы кэмҥэ анаан Майатааҕы “Түмэн” уопсастыбаннай холбоһук көҕүлээһининэн “Сылаас суорҕан” аахсыйа биллэриллэн Майаҕа уонна улуус нэһилиэктэригэр ыытылла турар. Майа сэиэнньэтигэр суорҕан итиэннэ харчы хомуйуутугар уопсастыбанньык Людмила Пивоварова, түөлбэлэри сүрүннүүр исписэлиис Жанна Тумусова, анал байыаннай дьайыы кыттыылаахтарын дьиэ кэргэттэрин кытта үлэлиир Владилена Павлова салайааччыларынан үлэлииллэр.
Бүгүҥҥү туругунан уопсайа 45 суорҕан, 26 миэтэрэ флис таҥас, 11700 солкуобай харчынан киирдэ диэн көмөнү хомуйууга эппиэтинэстээх Людмила Пивоварова иһитиннэрдэ. Кини дьон кыттыыта көхтөөх диэн бэлиэтээтэ.
Манна бастакынан Ариадна Филиппова салайааччылаах “Самсонов” түөлбэ 4 суорҕан, Васианна Птицына салайааччылаах “Лесная” ТОС олохтоохторо 17, 5 м флис таҥас, Людмила Пивоварова салайааччылаах “Сэбиэскэй” түөлбэ 10 суорҕан аҕалан туттардылар. “ОБТ” үҥкүү түмсүүтэ 7 суорҕан, Федора Захарова салайааччылаах В.П.Ларионов аатынан орто оскуола тэхиньиичэскэй үлэһиттэрэ 10 суорҕан, Анна Алексеева уонна Алексей Бочкарев биирдии суорҕан уонна 1-дии тыһыынча солкуобай харчы биэрэн кыттыстылар.
Валентина Мартынова салайааччылаах “Түмсүү” түөлбэ Байкалов аатынан уулуссатын 6 нүөмэрдээх дьиэтин 12 ыалыттан 6200 солкуобай харчыны дьиэ олохтооҕо Нина Слободчикова туттарда. Бу түөлбэ эдэр олохтооҕо Туяра Матвеева 3 суорҕанынан көмөлөстө.
Бэдьимэ олохтоох дьаһалтатын исписэлииһэ Яна Попова 8,5 миэтэрэ флис таҥас аҕалан туттарда.
Майатааҕы 3-с көлүөнэ оскуолаттан Кыыдаана Прокопьева 2000, Пелагея Кулаковская 1000, Василий Романов 500 солкуобай харчынан көмөлөрүн оҥордулар.
Аахсыйаҕа көмөнү “Дьол түһүлгэтэ” уопсастыбаннай кииҥҥэ күн аайы өрөбүлэ суох 10.00 чаастан 17.00 чааска диэри туталлар.
Марелла Баишева.
