Төҥүлү нэһилиэгэр биир ытыктанар ыала, нэһилиэк бочуоттаах киһитэ, урбаанньыт Иван уонна кини кэргэнэ Мария Борисовтар бэйэлэрин үлэһиттэригэр сыл түмүгүнэн тэрээһин тэрийдилэр. Манна ыҥырыылаах ыалдьытынан Саха Өрөспүүбүлүкэтин Урбаан, эргиэн уонна туризм миниистирэ Тимур Ханды сырытта.
Иван Борисов тэрийбит, оҥорбут обьектарын, айанньыттар аһаан ааһар “Нал”, “Уют” кафеларын, ырыынагын уонна саха былыргытын көрдөрөр маллаах-саллаах балаҕан муннугар баарын, сэбиэскэй кэмнээҕи мал-сал, урукку кэмнээҕи олох чахчыларын кэрэһэлиир түмэни, тэлгэһэҕэ кыыл-сүөл турар түмэни сиһилии көрдө-иһиттэ. Тимур Ханды хас биирдии эбийиэктэри туруктарын, кэскиллээхтэрин инникитин өссө туох эбии түтүллүон сөбүн тоһоҕолоон ыйыталаста, сүбэлээтэ,биир киһи ылыммыт үлэтин сүрдээх элбэх үлэ миэстэтин таһааран дьону үлэлэтэ сылдьарыгар махтанна, инникитин бииргэ үлэлэһиэх буолла. Бу көрсүһүү кэнниттэн инники былааннар, соруктар нэһилиэк аҕа баһылыгын Петр Эверстовтыын кытта туруолуннулар.
Өрөспүүбүлүкэҕэ биллэр Төҥүлү олохтооҕо норуот маастара тимир ууһа Леонид Говоров кини араас таһымнаах куонкурустар кыайыылааҕа, үлэлэрэ араас быыстапкаларга турбута, бэйэтэ оҥостубут мастарыскыайыгар ыалдьыттаата. Манна сахалыы быһахтары, батастары уо.д.а көрөн сөхтө уонна инникитин сибээһи быспакка кини үлэлэрэ киэҥ эйгэҕэ тахсарыгар баҕарда. Ити кэннэ нэһилиэккэ Надежда Оконешникова салайааччылаах “Сайдам” уопсастыбаннай түмсуу үлэтин, тугунан дьарыктаналларын сиһилии билистэ. Бу түмсүүгэ эйэҕэс эбээлэр туох ситиһиилээхтэрин, инники былааннарын билиһиннэрдилэр.
Иван Борисов “Айылгы” балаҕаныгар бары үлэһиттэрэ Сылы түмүктүүр тэрээһиҥҥэ тоҕуоруһа муһуннулар. Манна Тимур Ханды үлэһиттэргэ эҕэрдэ тыл уонна наҕараадалары туттарда. “Урбаан, эргиэн үлэтин сайдыытын иһин” үрдүк аатын ыллылар: Айталина Петрова,Любовь Сметанникова, Анна Реева, ону таһынан махтал суруктары бастыҥ үлэһиттэр туттулар. Урбаанньыт Иван Иванович хас биирдии үлэһиттэригэр сыл түмүгүнэн махтанан туран анал бэлэхтэри,лоторея оонньотон ларь морозильник, холодильник, истиэҥкэ миэбэл, хомуот, тэлэбиисэр бааттаахтар ыллылар. Оҕолоругар төрөппүттэр ааттарыттан өйөбүллэрин иһин махтанан анал бэлэхтэри туттартаата. Харда тылы уола Юрий Иванович үлэһиттэргэ махтанан туран туоһу суруктары, тэлэбиисэрдэри анаата. Сылы түмүктээн обьектар үлэһиттэрэ үчүгэй Саҥа дьыллааҕы көрдөрүүнү көрдөрдүлэр уонна үлэһиттэр ааттарыттан Иван Ивановичка махтал сурук туттардылар. Ылбаҕай ырыаларынан Еремей Гоголев, Линда Захарова, Кирилл Матвеев бэлэхтээтилэр.
Иван Борисов бииргэ үөрэммит үөлээннээхтэрэ харда тыл эттилэр уонна кининэн киэҥ тутталларын, үлэтигэр өссө элбэх ситиһиилэри,идеялара, былааннара олоххо киирэригэр баҕардылар.
Вера Владимирова
Дьокуускай