2024 сылга «Бэтэрээҥҥэ суруттар” аахсыйабыт салҕанар. Манна ким баҕарар кыттан оройуоммут “Эркээйи» хаһыатыгар аҕам саастаах дьоммутугар, анал байыаннай дьайыы кыттыылаахтарын дьиэ кэргэттэригэр, үлэ, тыыл бэтэрээннэригэр, ону тэҥэ, элбэх оҕолоох, тииммэт-кыаммат ыалга сурутуу оҥорон үөрүүнү бэлэхтиэн сөп.
Аахсыйаҕа куруутун кыттар, өйүүр успуонсардарбытыгар дириҥ махталбытын биллэрэбит. Ил Түмэн дьокутаата Андрей Находкин, урбаанньыт Руслан Федотов биир дойдулаахтарыгар сыллааҕы сурутууну хаһыс да сылларын бэлэхтээн ытык-мааны дьоммут улууспут сонуннарын көтүппэккэ ааҕа олороллор. Юрий Баишев быйылгы сылга Төҥүлүттэн 4, Андрей Михайлович уонна Руслан Еремеевич улууска олорор 10-нуу, Ил Түмэн дьокутааттара Олег Марков 12, Захар Никитин 5, Тихон Скрябин 4 тыыл уонна үлэ бэтэрээннэригэр итиэннэ анал байыаннай дьайыы кыттыылаахтарын дьиэ кэргэттэригэр сыллааҕы сурутуу бэлэх ууннулар. Улууспут нэһилиэктэрин олохтоох дьаһалталара эрэдээксийэни кытта ыкса стимнээхтик үлэлииллэр. Кинилэр сыллата тыыл бэтэрээннэригэр сыллааҕы сурутууну бэлэхтииллэрэ үтүө үгэскэ кубулуйбута.
Маны тэҥэ, биирдиилээн уопсастыбанньыктар сыллааҕы сурутууну хаһыс да сылларын бэлэхтииллэр. Быйыл “Вилена” маҕаһыын хаһаайката Елизавета Иванова 5 ыалга, “Талер” маҕаһыын хаһаайына Дмитрий Катакинов анал байыаннай дьайыы кыттыылааҕар 1 ыалга, Балыктаах нэһилиэгиттэн олохтоох дьаһалта баһылыга Александр Куприянов 2, баһылыгы солбуйааччы Иван Мохначевскай 2, Лариса Кычкина сэбиэдиссэйдээх бэтэринээр учаастага 1 бэтэрээҥҥэ сурутуу биэрдилэр. Бу ааттаммыт дьон сурутуу барар хампаанньатыгар сыллата кыттар үтүө үгэстээхтэрэ үөрүүлээх. Балыктаах уопсастыбаннай кэрэспэдьиэнэ Мария Захарова нэһилиэгин дьоно улуус хаһыатын ааҕалларыгар күүскэ үлэлэһэрин бэлиэтиир тоҕоостоох. Догдоҥо нэһилиэгиттэн улуус дьокутаата Иван Пивоваров 2, уопсастыбаннай кэрэспэдьиэн Светлана Иванова 2, Майаттан Иннокентий Березкин, Инна Николаева, Төҥүлү оскуолатын 1975 сыллаахха бүтэрбиттэр ааттарыттан Дьокуускай куораттан Марфа Евсеева, Татьяна Березкина, Айталина Решетникова, Ольга Борисова сыллааҕы сурутууну биирдиилээн ыалга хаһыс да сылларын бэлэх ууналларын махталынан ахтабыт.
“Эркээйи” хаһыат ааҕааччыларыгар сонуннары сойуппакка таһаарарга итиэннэ тиэрдэргэ кыһаллар. Ол чэрчитинэн, Майатааҕы «Түмэн” уопсастыбаннай холбоһук салайааччыта Мария Лукина көҕүлээһининэн быйыл “Эркээйи” волонтердара” хамсааһын үһүс сылын үлэлээн саҕалаата. Манна эдэр ийэлэр Акулина Устинова, Евдокия Заровняева, Саргылана Васильева уонна Полина Осипова бэйэлэрин тустаах үлэлэрин быыһыгар хаһыаты тахсыбыт күнүгэр чэппиэргэ аадырыстарынан тиэрдэргэ үтүө суобастаахтык үлэлээтилэр. Быйыл волонтерунан хаһыаты сыллата сурутан ааҕааччыбыт Любовь Дьячкова эбилиннэ.
Билиҥҥи курдук куйаар ситиминэн араас таһаарыы элбээбит кэмигэр кумааҕы хаһыаппытыгар сурутууну көҕүлээччилэрдээх буоламмыт, хаһыаппыт тахсар ахсаана көҕүрээбэт. Тохсунньу 11-12 күннэригэр Арассыыйа Бэчээтин күнүн көрсө “Сахабэчээт” судаарыстыбаннай тэрилтэ улуустар хаһыаттарын эрэдээксийэлэрин үлэһиттэригэр сэминээр ыытта. Манна бастакы күн 2023 сыллааҕы үлэ түмүгүнэн киин улуустарга хаһыаты сурутууга “Эркээйи” хаһыат 1-кы миэстэҕэ тахсан үөрүүбүт үрдээтэ. Бу ситиһиибитинэн биһиги хаһыаппыт эрэллээх сурутааччыларыгар, олохтоох дьаһалталарга, успуонсардарбытыгар, волонтердарбытыгар барҕа махталбытын тиэрдэбит, салгыы даҕаны бииргэ үлэлэһэргитигэр эрэнэбит.
“Эркээйи” хаһыаты сэргэ, ULUS MEDIA сайтаахпыт, «gazetaerkeii” телеграм ханааллаахпыт. Манна киирэн сурутан сонуннары көтүппэккэ ааҕаргытыгар ыҥырабыт, сурутаргытын күннэтэ кэтэһэбит.
“Эркээйини» сурутан ааҕыҥ, «Эркээйилиин» бииргэ буолуҥ!
Марелла Баишева.
