Дойду уонна өрөспүүбүлүкэ үрдүнэн доруобуйаларынан хааччахтаах дьоҥҥо улахан болҕомто ууруллар, киэҥ хабааннаах үлэлэр ыытыллаллар. Ол чэрчитинэн, Саха Өрөспүүбүлүкэтигэр Үлэ уонна социальнай сайдыы министиэристибэтин өйөбүлүнэн улууска тус сыаллаах бырагыраамалар үлэлииллэр.
Доруобуйаларыгар хааччахтаах дьоҥҥо, доруобуйатыгар хааччахтаах оҕолоох дьиэ кэргэттэргэ, ыарахан балаһыанньаҕа түбэспит дьиэ кэргэттэргэ, аҕам саастаах, соҕотох хаалбыт дьоҥҥо дьиэлэригэр толору хааччыллыыны, гаастааһыны киллэрэргэ, социальнай эбийиэктэргэ сылдьалларыгар табыгастаах усулуобуйаны оҥорууга, о.д.а. көрүҥнэргэ көмөлөр бааллар.
Мэҥэ Хаҥалас улууһун социальнай көмүскэллээх буолуу кэлим киинэ Арассыыйаҕа Дьиэ кэргэн, өрөспүүбүлүкэҕэ Оҕо саас сылларын чэрчитинэн, Микрореабилитационнай киин, «Көрүү-истии оскуолата» уонна доруобуйаны чөлүгэр түһэрэр техническэй тэриллэри уларсыкка биэрии бырайыактарын олоххо киллэрэн саҕалаата.
Доруобуйаларыгар хааччахтаах дьон дэкээдэлэрин түмүк күнүгэр социальнай көмүскэллээх буолуу кэлим киинигэр саҥа бырайыактары билиһиннэрэр бэлиэ күҥҥэ улуус баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева, социальнай көмүскэллээх буолуу кэлим киинин салайааччыта Иван Шестаков, кини солбуйааччыта Мария Федорова, биэнсийэ пуондатын уонна социальнай страховкалааһын салаатын начаалынньыга Василий Григорьев, үөрэх управлениетын начаалынньыгын солбуйааччы Михаил Петров, улуус балыыһатын педиатр бырааһа Жанна Адамова, Аллараа Бэстээхтэн, Майаттан доруобуйаларынан хааччахтаах оҕолоох дьиэ кэргэттэр кыттыыны ыллылар.
Альбина Андреевна олохпут балысханнык сайдарын, дьиэҕэ олорор инбэлиит дьоҥҥо көмө улааттар улаатан иһэрин бэлиэтээтэ итиэннэ улуус дьаһалтатын, тус бэйэтин аатыттан эҕэрдэлээн туран, улуус баһылыгын уонна дьокутааттарын ааттарыттан социальнай көмүскэллээх буолуу кэлим киинин салайааччытыгар Иван Шестаковка Эҕэрдэ сурук, сэмэй көмө туттарда.
Кэлим киин салайааччыта Иван Шестаков: “Аан дойдутааҕы инбэлииттэр күннэрин чэрчитинэн сэтинньи 26 күнүттэн ахсынньы 5 күнүгэр диэри дэкээдэ ыыттыбыт. Дойдубут Бэрэсидьиэнэ, Ил Дархаммыт кэнники сылларга дьоҥҥо-сэргэҕэ өҥөнү хаачыстыбалаахтык оҥорууга, тус сыаллаах көмө хас биирдии доруобуйатыгар хааччахтаах киһиэхэ тиэрдиллэрин хааччыйыыга, судаарыстыбаннай көмөнү нэһилиэнньэҕэ тириэрдиигэ анал сыаллары туруорбуттара. Биһиги министиэристибэбит сайдыылаах эрэгийиэннэргэ учреждение салайааччыларын, исписэлиистэри ыытан уопут ылан кэлбиттэрэ. 2020 с. хоту улуустар бары сокуоннай саастарын ситэ илик оҕолор кииннэрин, социальнай көмүскэллээх буолуу управлениетын холбооннор кэлим киин буолбуттара. Манна ааспыт сылтан киин улуустар сыыйа киирбиттэрэ. Сэтинньи 25 күнүгэр биһиги комплекснай киин буоллубут. Инникитин элбэх хайысхалаах дьиэ кэргэн киинэ буолуохтаахпыт” диэн кылгастык сырдатта.
Саҥа бырайыактары социальнай көмүскэллээх буолуу кэлим киинин исписэлиистэрэ сылаайданан көрдөрөн сырдаттылар.
Улууска 276 инбэлиит оҕо баар. Микрореабилитационнай киин бу оҕолортон 12 ыарахан туруктаах, дьиэттэн тахсыбат оҕолору, ону тэҥэ, дьиэҕэ үөрэнэр 58 оҕо баарыттан доруобуйаларыгар ыарахан кэһиллиилээх оҕолору талан, дьиэ усулуобуйатыгар чөлүгэр түһэрэр үлэлэри (реабилитация), дьарыктары ыытар сыаллаах-соруктаах хас да түһүмэҕинэн үлэлиир. Бу киин үлэтин хайысхаларын туһунан социальнай реабилитация уонна дьиэ кэргэни арыаллааһын салаатын сэбиэдиссэйэ Лилия Расторгуева билиһиннэрдэ.
Кэлим киин кылаабынай эксперт-исписэлииһэ Александра Афанасьева икки бырайыагы: көрүү-истии оскуолатын уонна дьон чөлугэр түһэригэр аналлаах тэриллэри уларсыкка биэрии пуунун үлэлэтэр. Көрүү-истии оскуолатыгар ыарыһаҕы сөптөөхтүк көрөргө-истэргэ, орон-тэллэх дьоно буолбут аҕам саастаахтары уонна доруобуйаларынан хааччахтаах дьон аймахтарыгар, социальнай үлэһиттэргэ үөрэтиини ыытар. Үөрэхтэр өрөспүүбүлүкэтээҕи социальнай хааччыйыы кэлим киинэ (Н.Н.Пахомова) бэлэмнээбит видео уруоктарынан бараллар. Кииҥҥэ дьон чөлүгэр түһэригэр аналлаах 28 көрүҥ тэрил баар.
Доруобуйатыгар хааччахтаах уонна инбэлиит оҕолордоох ыал элбэх ыарахаттары көрсөллөр. Маныаха социальнай көрүүгэ наадыйар кыаммат, ыалдьар дьоҥҥо судаарыстыбабыт кыһамньытынан киэҥ хабааннаах, элбэх хайысхалаах бу курдук саҥа бырайыактар олоххо киирэллэр.
Марелла Баишева.
