Төрөөбүт дойдуга таптал төгүрүк алааскыттан, улааппыт түөлбэҕиттэн саҕыллар, ийэ тылгынан иһирэх иэйии буолан иҥэр. Оттон төрөөбүт дойдуга сыһыан дойдугун -сиргин билииттэн, үөрэтииттэн саҕаланар.
Билиҥҥи кэмҥэ сирбит-дойдубут, алаастарбыт,үрэхтэрбит ааттарын билбэт буоллубут. Эбиитин Россия каартатыгар сыыһа суруйтараммыт суол кытыытыгар араас халы-мааргы суруллубут аат элбэх, оҕолорбут онон сирдэтинэн улааталлар.
Ааспыт сайын Бүлүүгэ айаннаан иһэммин көрдөхпүнэ биир да сахалыы сурук суох. Бэл, үрэхтэрбит киһи аатынан ааттаммыттар. Бука , төрүт ааттааҕа буолуо дии.
Бэйэбит улууспут туһунан эттэххэ ,биир оннук көстүү тахсар. Балыктаах суолугар «Оленгнех «диэн үрэх аата суруллан турар. Сэрэйдэххэ, Өлөҥнөөх диэн эбитэ дуу?
Нэһилиэктэргэ үгүс оттуур ходуһа сир, алаастар кадастр нүөмэринэн биллэллэр, «Бөтүрүөптэр, Сиидэрэптэр оттуур сирдэрэ» диэн ааттаналлар.
Соторутааҕыта Догдоҥо нэһилиэгин ытыктанар киһитин, сэбиэскэй кэм уопуттаах салайааччытын , сир түннүгүн, сээркээн сэһэнньит Спартак Юрьевич Титову көрсөн төрүт ааттары сөргүтэр үлэ саҕаланан эрэрин кэпсээбиппэр сэргээтэ. Спартак Юрьевич курдук аҕа көлүөнэ дьоммутун кытыннаран сирбит-дойдубут төрүт аатын тилиннэриигэ, докумуоҥҥа киллэриигэ, сахалыы бэлиэлэри туруорууга нэһилиэгинэн ылсыаҕыҥ.
Көлүөнэ солбуйсан саастаах дьон айылҕа быһыытынан бара турар, кинилэри кытта үтүмэн элбэх билии, духуобунай баайбыт барсар, сүтэр.
Онон, сир -дойду төрүт аатын тутан хаалар үлэни тэрийии
биһиги кэммит биир уталыйбат соруга буолар, ону олохтоох дьаһалта аҕа саастаах дьону, кыраайы үөрэтээччилэри түмэн бу үлэни ылсара ирдэнэр.
Евдокия Решетникова, «Ийэ тыл «түмсүүттэн