Сэтинньи ыйа-Байанай ыйа. Бу ыйга булчуттар ыраах бултуу-алтыы бараллар. Күндү түүлээҕи эккирэтэллэр, эһэкээннэригэр үөмэллэр, айах туталлар. Оту-маһы алдьатыам суоҕа, наадыйарбын эрэ ылыам диэн андаҕар тылын этэллэр. Маныаха өбүгэлэрбит оҕо кыра эрдэҕиттэн төрөөбүт ийэ айылҕатын, кини маныылаах кыылларын-көтөрдөрүн харыстыы, таптыы улаатарын ситиһэллэрэ. Бу үтүө сиэри, үгэһи кэлэр кэнчээри ыччаппытыгар тириэрдии барыбыт сорукпут буолар.
Сэтинньи 15 күнэ В.П.Ларионов аатынан Майа орто оскуолатын алын кылаас учууталларыгар, үөрэнээччилэригэр олус уратытык ааста. Бу күн уруоктар барыта Баай Барыылаах Байанайга ананнылар. Оҕолор Баай Байанай диэн кимин биллилэр, кыыллар-көтөрдөр суолларын араара үөрэннилэр, алгыстаах алаадьы буһардылар, айар үлэлэри оҥордулар, тобуллаҕас толкуйдарынан Байанайга сыһыаннаах араас сорудахтары оҥордулар, тыаҕа сылдьыы быраабылатын хатылаатылар, уруһуйдаатылар элбэх саҥаны биллилэр.
Һук,һук,һук.
Дьолуону тосхойооччу
Өлгөмү биэрээччи
Хара тыа хаһаайына
Тумул тыа тойоно
Кыһыл саһыл кымньыылаах
Ой буур оонньуулаах
Көй боллох сэксэ олохтоох,
Сөҥ сөгөлөөн тусаһалаах
Эһээ диэтэххэ
Эһээ диэччи
Бардам Тутуу
Барылы Кэскил
Барыылаах
Баай Байанай Тойон эһэм
Бэттэх көрөн
Мичик гын!
Дом!
