«Сергучевскай ааҕыыларга» чөл олохтоох дьиэ кэргэннэр дьарыктарын, уопуттарын үллэһиннилэр

Бу нэдиэлэҕэ Майаҕа Чөл олох күннэрэ ыытылла тураллар. Олунньу 29 күнүгэр Арассыыйа Федерациятын үтүөлээх учуутала, «Үлэ Кыһыл Знамята» уордьан кавалера, Баатара, Дьабыыл нэһилиэктэрин бочуоттаах олохтооҕо, Саха Өрөспүүбүлүкэтигэр чөл олох хамсааһынын төрүттээччи Иннокентий Егорович Сергучев аатынан «Сергучевскай ааҕыылар» буоллулар.

Кэмпириэнсийэҕэ «Чөл туруктаах оҕону иитии: үлэ уопута, инники сайдыы хайысхалара», «Чөл туруктаах дьиэ кэргэн – кэм ирдэбилэ», «Чөл туруктаах буолуу – ыччаппыт кэскилэ» диэн тиэмэлэргэ дьиэ кэргэннэр бэйэлэрэ бэлэмнээбит дакылааттарынан кыттыыны ыллылар.

«Мин холобур оҥостор, киэн туттар дьонум» Ф.Г.Охлопков аатынан Майа орто оскуолатын 2 «б» кылааһын үөрэнээччитэ Арылхан Охлопков ( салайааччы Елена Чичахова); «Бэйэ оҥоруу спортивнай инвертардара» Светлана, Александр Ефимовтар (В.П.Ларионов аатынан Майа орто оскуолатын төрөппүттэрэ); «Эмтээх үүнээйи – биһиги дьиэ кэргэн дьарыга» Светлана Дьяконова (салайааччы А.М.Леонтьева, В.П.Ларионов аатынан орто оскуола социальнай педагога); «Эмтээх оттор туһалара» Акулина Сыроватская ( В.П.Ларионов аатынан Майа орто оскуолатын төрөппүтэ); «Оҕону сайылыкка иитии» Анна, Андрей Кычкиннар («Кэнчээри» оҕону сайыннарар киин, «Тииҥчээн» бөлөҕүн төрөппүттэрэ); «Биһиги түөрт атахтаах доҕотторбут» Саргылана Шестакова («Кэнчээри» оҕону сайыннарар киин, «Сир симэхтэрэ» бөлөх төрөппүтэ); «Биһиги дьиэ кэргэммит үгэстэрэ» Альбина Ядрихинская («Мичил» оҕону сайыннарар киин төрөппүтэ).

«Сергучевскай ааҕыылар» кэмпириэнсийэ түмүгүнэн Анна, Андрей Кычкиннар «Оҕону сайылыкка иитии» дакылааттара кыайыылаах үрдүк аатын ылла.

Иннокентий Егорович Сергучев 1976 сыллаахха таһааттарбыт кинигэтигэр «Бар дьоммор кэс тыл» диэн ыстатыйатыгар эппит:

«Бастакытынан: Арыгыны иһимэҥ – эстиэххит! Иккиһинэн:  Өтөх төнүргэһэ суох буолбат, онон ийэ ууһун салгыыр ыччаттаах буолун! Сахалар, элбиир, чэчириир туһугар, арыгыттан уоттан, сидьиҥтэн, дьааттан куттанар курдук куттаныҥ! Арыгынан айах тутумаҥ, ол оннугар ил элбэх, сэһэн элбэх, эйэ элбэх буоллун! Харчы, мал-сал, мотоцикл, массыына, таҥас-сап, баай-талым туһугар олоххутун анаамаҥ, ол эрэ туһугар мөхсүмэҥ!

Баай диэн – Оҕо! Дьол диэн – Оҕо! Кэскил диэн – Оҕо! Бэйэҕэр суох буоллаҕына, оҕо дьиэтиттэн да ылан оҕото иит. Ийэ ууһун салгыыр, тэнитэр туһун өйдөө!» — хайдахтаах курдук бэргэн тылларый! Улуу дьоммутунан киэн туттуоҕуҥ, кинилэр суолларын батыһыаҕыҥ.

 

Елизавета Неустроева.