Бүгүн Сэбиэскэй Сойуус Дьоруойа Федор Кузьмич Попов төрөөбүт күнэ. Сахалартан икки маҥнайгы дьоруойдаах дойдулары туох ситимниирин, сибээстиирин бүгүн билиһиннэриэхпит.
— Суруйааччы Иван Сысолятин «Ох курдук оҥостон» кинигэтигэр Баатара оскуолатын үөрэнээччилэрин кытары Бүтэйдээх Куолларатын Күөчүйэтигэр баар дириҥ күөлү кэлэн чинчийэн барбыттара кэпсэнэр.
— Ф.К.Попов бииргэ төрөөбүт эдьиийэ Мария Кузьминична кэргэнинээн Сергучев Семен Алексеевичтыын 1943 с. Бүтэйдээххэ көһөн кэлэн олохсуйбуттара. Сергучевтар оҕолоро бары Бүтэйдээххэ төрөөбүттэрэ, улааппыттара, үөрэммиттэрэ.
— Дьоруой күтүөтэ Семен Алексеевич Сергучев манна «Комбайн» холкуоска биригэдьиирдииригэр элбэх киһини хоргуйууттан быыһаабыта, сахалартан маҥнайгы Социалистическаҋ Үлэ Дьоруойа А.Е.Степановы үүннэрбитэ.
— Сергучевтар соҕотох уолларын убайын аатынан Федя диэн ааттаабыттара. Уол хоройо улаатыытыгар саха худуоһунньуктара Бүтэйдээххэ анаан кэлэн, убайын уобарастаан хаста да уруһуйдаабыттара.
— Эдьиийигэр кэлэн олорон Ф.К.Попов бииргэ төрөөбүт балта Евдокия Кузьминична Попова Бүтэйдээх 7 кылаастаах оскуолатын үөрэнэн бүтэрбитэ.
— Дьоруой Попов улахан убайа Дьөгүөр уола Михаил Егорович Попов, оройуоммут биллиилээх салайааччыта, Бүтэйдээх күтүөтэ. Кэргэнэ Матрена Афанасьевна Сидорова оҕо саадтарын салайбыт РСФСР норуотун үөрэҕириитин туйгуна этэ. Улахан уоллара Аполлон Михайлович Попов Бүтэйдээх орто оскуолатын дириэктэринэн үлэлээбитэ.
— Бүтэйдээххэ өр сыллар усталарыгар элбэх көлүөнэ оҕону төрөөбүт тылга уһуйбут Маргарита Дмитрьевна Неустроева ийэтэ Прасковья Яковлевна Федор Кузьмич эдьиийин аатын ылбыт. Ийэтэ Поповтар хос эбээлэрин кытары бииргэ төрөөбүт.
— Баатара орто оскуолатыгар баар Дьоруой партатыгар олорбут бастыҥ үөрэнээччилэр Бүтэйдээххэ үөрэммиттэрэ. Калмыкия, РФ үтүөлээх тириэньэрэ, успуорт маастара, педагогическай билим хандьыдаата Иннокентий Кузьмин, мас тардыһыытыгар успуорт маастара, Саха сирин абсолютнай чөмпүйүөнэ Владимир Шарин, норуот маастара Лаврентий Романов о.д.а.
— Мария Кузьминична быраатын көмүс уҥуоҕар Белоруссияҕа бара сылдьыбыта. Кэлин биир дойдулаахтара баран кэлиилэрэ үтүө үгэс буолла. Үөрэнээччилэртэн Женя Кузьмин, Юлия Чямпина, Андрей Брызгалов, Федот Сергеев, баһылыкпыт Александр Слепцов сылдьыбыттара.
— Аллараа Бэстээххэ Сэбиэскэй Сойуус Дьоруойа Ф.К.Попов пааматынньыгын Бүтэйдээхтэн РФ Худуоһунньуктарын сойууһун чилиэнэ Павел Иннокентиевич Чямпин оҥорбута.
— Дьоруойбут 100 сылыгар аймахтара анал ахтыы киэһэтин оҥорбуттара. Кыраайы үөрэтэр түмэлгэ икки истиэндэ оҥоһуллан турар. Култуура эстэпиэтэтин кэнсиэрэ Ф.К.Поповка анаммыта. Онно Харитон Смолин Дьоруой табыллыбыт мэтириэтин оҥорбута.
«Сэндиэлэ» түмсүү, түмэллэр.
Бүтэйдээх.
