Санкт-Петербург куоракка үөрэнэр, олорор да астык

Киин үөрэх кыһаларыгар биһиги улуустан элбэх оҕо үөрэнэр. Бүгүн Санкт-Петербург куоракка үөрэнэр устудьуоннар олохторун-дьаһахтарын туһунан онно үөрэнэ сылдьар Айсен Корякинтан билистибит.

Айсен Санкт-Петербург куоракка «ЛЭТИ» электротехническэй судаарыстыбаннай университет 3-с кууруһугар үөрэнэр:

— Мин прикладной математика уонна информатика салаатыгар үөрэнэбин, бу үөрэххэ биир кэлим эксээмэн түмүгүнэн туттарсан киирбитим. Үөрэххэ киирэргэ үс биридимиэт ирдэнэр этэ – нуучча тыла, математика уонна информатика. Эксээмэн кэннэ баалым холбоон 270 буолан, бүддьүөт миэстэтигэр тиксибитим. Бэйэм 9-с кылааска диэри Бэдьимэ орто оскуолатыгар үөрэммитим. Салгыы өрөспүүбүлүкэтээҕи лиссиэй-интэринээккэ киирэммин, лиссиэйи кыһыл көмүс мэтээллээх бүтэрбитим. Аан бастаан атын куоракка тиийэр интэриэһинэй. Киһи бөҕөтө баар да, эн кими да билбэккин. Ол эрээри 9-с кылаастан саҕалаан интэринээккэ олорбут уопуттаах буолан, бэрт түргэнник үөрэммитим. Интэриниэт күүскэ сайдан, төлөпүөн нөҥүө дьоммун кытта күн аайы кэпсэтэр, билсэр этим. Быйыл манна номнуо үһүс сылым. Онон ыраах олоро үөрэнним. Манна олорор, үөрэнэр да астык. Арай, дойдубуттан ордук ахтарым диэн сандаарыччы тыгар күн уота. Питер, этиллэрин курдук, былыттаах уонна тыаллаах куорат. Манна кыһынын күнү олох да көрбөккүн диэххэ сөп. Биирдэ эмэ күн тыктаҕына, Сахам сирин санатан, ахта сылдьар киһиэхэ, бэл, сүргэм кытта көтөҕүллүбүт курдук буолааччы.

Университеппытыгар Саха сириттэн сылдьар оҕолор элбэхпит. Мин уопсайга олоробун. Хоспутугар иккиэ этибит, нуучча уолун кытта олорбутум, ол эрэн уолум үөрэҕин кыайбакка быраҕан дойдутугар төннүбүтэ. Билигин хоспор соҕотохпун. Үөрэххэ бастакыттан кыһаллыахха наада, барыта бэйэҕиттэн тутулуктаах. Биир да күнү көтүппэккэ, преподавателлар биэрэр билиилэрин чиҥэтэн истэххэ барыта кыаллар. Бородуукта сыаната биһиги дойдубутуттан лаппа чэпчэки, онон бородууктабын бэйэм атыылаһан, хоспор астанан аһыыбын.

Иллэҥ кэммэр эмиэ манна Питерга үөрэнэр, Дьокуускайга бииргэ үөрэммит оҕолорбун көрсөөччүбүн. Мустаммыт остуол оонньууларын оонньуубут, киинэҕэ сылдьабыт, куорат устун күүлэйдиибит. Улахан, кыраһыабай куорат буолан аралдьыйар, сылдьар сир олус элбэх.

Соҕуруу үөрэнэр ыарахан, истипиэндьийэ харчыта олус кыра, 2-3 эрэ тыһынча буолар. Ону да олус чэпчэкитик сүтэриэххин сөп — биир «үстэн» истипиэндьийэҕин сотоллор. Ол иһин харчы боппуруоһа төрөппүттэргиттэн олус тутулуктаах, эрдэттэн дьиэ кэргэн барытын толкуйдаан, ону учуоттаан оҕотун ыраах ыытыан наада.

Соҕуруу туттарсыан баҕалаах оскуоланы бүтэрээччилэргэ сүбэлиэм этэ: туохтан да куттаммакка, дьону кытта билсэн, кэпсэтэн, иннигит хоту баран иһиҥ, бэйэҕэ эрэллээх буолуҥ диэн.

Айсеҥҥа кэпсээнин иһин махтанабын. Талан ылбыт идэтигэр ситиһиилээх үөрэҕи, IT хайысхатын чиҥник баһылаан, үөрэҕин этэҥҥэ түмүктээн, дойдутун, улууһун, өрөспүүбүлүкэтин ааттатар үтүө үлэһит киһи буолан тахсарыгар баҕарабын.

 

Елизавета Неустроева.