Сааскы маҥнайгы бырааһынньык чугаһаата. Сандал саас кэрэ сибэккитэ, биллэн турар, тюльпан буолар.
Тюльпан сибэккибит үөскээбит сирэ Ближнэй Восток эбит. Сибэкки аата персидскэй «тюрбан» диэн тылтан, быһыытынан төбөнү саптар таҥаска майгынныырын иһин үөскээбит. Үгүс дойдуларга бу сибэкки «эйэ, сырдыкка тардыһыы, киэҥ көҕүстээх буолуу» диэн суолталаах. Саха сатаабатаҕа суох дииллэринии, бу кэрэ бэйэлээх сибэккини Сахабыт сиригэр, тыйыс тымныы килиимэккэ да көрөн-харайан, бүөбэйдээн үүннэрэр буолан эрэллэр.
Майаҕа олорор эдэр ыал Санниковтар, номнуо үһүс сылларын тюльпан сибэккинэн дьарыктаналлар. Быйыл Надеждалаах Вячеслав уонтан тахса суорду соҕурууттан сакаастаан ылан олордубуттара сааскы маҥнайгы бырааһынньыкка бэлэм буолан, сибэккилээн эрэллэр. Сибэккилэри гидропоника ньыматын туһанан ууга үүннэрэллэр. Кэлии сибэккилэрдээҕэр бэйэ үүннэрбит сибэккитэ хаачыстыбатынан быдан ордук буолар диэн, бэйэлэрин уопуттарыгар олоҕуран «Саха сиригэр тюльпаны үүннэрии» диэн ааттаах анал үөрэх тэрийэн, баҕалаах дьону үөрэппиттэр. Саха сирин улуустарыттан уонча дьиэ кэргэн кинилэргэ үөрэнэн, быйыл тюльпан сибэкки элбэх сиргэ силигилии үүммүт.
Оттон Вероника Лепчикова Аллараа Бэстээххэ тимир суол үлэһитэ, Майа сэлиэнньэтин олохтооҕо, дьиэ кэргэн эбии дохуоттаах буоларыгар кыһаллан, Санниковтар ыытар үөрэхтэрин сэргии көрөн, тута суруйтарбыт. Ийэтэ Оксана Ивановна эдэр эрдэҕиттэн оҕуруокка сыстаҕас буолан, дьиэ кэргэн кыһыннары оҕурсу үүннэрэр бэлэм тэпилииссэтэ, Вероника сибэкки үүннэрэр баҕа санаатыгар улахан оруолу ылбыт. «Саха тюльпан» ыыппыт үөрэҕин ааһан, соҕуруу куораттан сэттэ араас суортаах алта тыһыынча тюльпан луковицатын сакаастаабыта, икки нэдиэлэнэн айаннаан кэлбит. Санниковтар ньымаларынан, гидропоникаҕа олордон, микрокилиимэтин тутуһан, күн бүгүн биэс тыһынчаттан тахса сибэккини ылан, «Майа тюльпан» диэн ааттанан, атыыга бэлэмниир.
Тюльпан үүнэригэр табыгастаах кыраадыс – алтаттан уон түөрткэ диэри. Онон бу сибэкки тымныыны, сөрүүн салгыны сөбүлүүрүнэн Саха сиригэр ордук барсар эбит. Вероника Лепчикова тюльпан үүннэриитин биһирээбит, бастаан саҕалааһыҥҥа куһаҕана суох диэн, инникитин атын да суортарга холонон көрүөн баҕарар.
Бэйэбит дойдубутугар үүммүт кэрэ сибэккилэр дьону үөрдэ, элбии, чэчирии, чэлгийэ турдуннар!
Елизавета Неустроева.
