Саха төрүт үгэһин оскуолаҕа иҥэриини киэҥ эйгэҕэ сырдатыы туһунан бырайыак быыстапка бэстибээлигэр

Дьокуускай куорат «Айыы кыһата » национальнай гимназияҕа Сахамедиаҕа сыһыаннаах үгүс үөрэнээччи иккис төгүлүн бу бырайыак тула тоҕуоруһа муһунна.
Сэргэх тэрээһин буолла диэн сыаналаатыбыт: алгыс ылыыта, «Айыы кыһата» үөрэнээччилэрин эҕэрдэ үҥкүүтэ  тэрээһини аста. Онтон «Тооку» НКИК ханаал эрэдээктэрдэрэ Ирина Соловьева, Сахаайа Яковлева уонна аниматор Настасья Гаврильевна маастар кылаастара болҕомтону тарта. Дьэ, ол кэннэ биллиилээх киинэ режиссера Михаил Лукачевскайы кытта көрсүһүү  буолла. Ойуулуктары сахалыы дубляжтаан, нууччаттан сахалыыга тылбаастыылларын, сахалыы ойуулук оҥоруу  үлэтин билиһиннэрдилэр, ыйытыыга хоруйдаатылар. Михаил Лукачевскай саха киинэтин биллэр режиссера, «Кыталыктар кырдаллара»  киинэ сүрүн  дьоруойа Михаил Слепцов ыалдьыттаан, араас боппуруостарга эппиэттээтилэр уонна айар үлэлэрин туһунан сэһэргээтилэр.
Барыта биэс оскуола кытынна. Саха политехническэй лиссиэй, П.Н., Н.Е.Самсоновтар ааттарынан Хатас оскуолата, И.Г.Тимофеев аатынан Майатааҕы лиссиэй, Суотту орто үөрэхтээһин оскуолата, «Айыы кыһата» национальнай гимназия «Сахамедиа» бөлөхтөрө алтыстылар. Оскуолаларын туһунан видеоматырыйаал бэлэмнээн кэлэн, билиһиннэрдилэр.  Бириэмэбитин туһалаахтык атааран, саҥаны билэн, кынаттанан  тарҕастыбыт. Аны саас муус устарга бу бырайыак иитинэн көрсүөх буоллубут.

Марианна Миронова, Майатааҕы лиссиэй 9-2 кылааһын  үөрэнээччитэ.