Д.Ф.Ходулов аатынан култуура киинигэр Аан дойду дьахталларын күнүн көрсө кулун тутар 7 күнүгэр улуус дьаһалтата, култуура управлениета кэрэ аҥаардарга, уопсастыбанньыктарга, тэрилтэ салайааччыларыгар итиэннэ анал байыаннай дьайыы кыттыылаахтарын дьиэ кэргэннэригэр анаан бэртээхэй сынньалаҥ киэһэтин тэрийдилэр.
Далбар Хотуттарбытын кэрэ тюльпан сибэккилээх көрүстүлэр, улууспут мелодистара айбыт дьон сөбүлээн истэр, ыллыыр ырыаларынан «Мэҥэ Хит» кэнсиэри бэлэх ууннулар. Айар талааннаахтарбыт, бастыҥ толорооччуларбыт мустубут дьон ытыһын тыаһыгар доҕуһуоллатан бииртэн биир кэрэ ырыаларын бэлэхтээтилэр. Кэнсиэри улуустааҕы култуура уонна духуобунай сайдыы управлениетын начаалынньыга Анна Исакова уонна саха тэлэбиидэнньэтин ыытааччыта Георгий Белоусов салайан ыыттылар.
Көрөөччүлэр ылбаҕай ырыалаах сынньалаҥ киэһэттэн олус үөрдүлэр, астыннылар.
