Атырдьах ыйын 10 күнүгэр Майа сэлиэнньэтигэр «Кыталык» уопсастыбыннай киинигэр Саха сиригэр физкултуура хамсааһынын 100 сылыгар уонна физкултууранан дьарыктанар дьон күнүгэр анаан улуустаҕы саахымат күрэхтэһиитэ ыытылынна.
Майа, Аллараа Бэстээх, Нөөрүктээйи, Хара, Төҥүлү, Хорообут, Дьабыыл, Тумул нэһилиэктэрэ уонна Амма улууһа саахымакка хамаандалары туруордулар. Уопсайа биэс киһиттэн турар 9 сүүмэрдэммит хамаанда кытынна. Дьахталларга 20 саастарыгар диэри, эр дьоҥҥо 20‒40, 40‒60, 60-тан үөһээ саастаахтарга бөлөҕүнэн күрэхтэстилэр.
Күрэхтэһии кыайыылааҕынан ыччаттар хамаандалара таҕыста. Михаил Куприянов хапытааннаах хамаандаҕа Майа ыччаттара Гаврил Колосов, Николай Сидоров, Александр Карпов, Степан Степанов оонньоотулар.
Иккис миэстэни Майаттан Василий Эверстов хапытааннаах орто көлүөнэ хамаандата ылла. Манна Андрей Брызгалов, Василий Аринкин Нөөрүктээйиттэн, Егор Михайлов Хараттан, Афанасий Хомподоев Майаттан киирдилэр. Үһүскэ бэтэрээннэр хамаандалара таҕыста. Бэтэрээннэргэ Майаттан Павел Цыпандин, Николай Климентов, Владимир Сидоров, Ульяна Шишигина, Догдоҥоттон Дмитрий Сыромятников‒Кэрэһиннээх оонньоотулар.
Күрэхтэһии судьуйаларынан Дмитрий Сыромятников‒Кэрэһиннээх уонна улуустааҕы ыччат уонна оҕо успуордун оскуолатын тириэньэрэ Гаврил Колосов үлэлэстилэр.
Иван Лукин.
