В.Н.Оконешников аатынан Павловскай орто оскуолатын 7 “в” кылааһын үөрэнээччилэрэ күһүҥҥү сынньалаҥы баттаһа, нэһилиэкпит, улууспут, өрөспүүбүлүкэбит тутаах тэрилтэтигэр — «Саханефтегазсбыт» тэрилтэҕэ экскурсияҕа сырыттыбыт.
Сарсыарда уон чааска бары оскуолаҕа мустан, куттал суох буолуутун туһунан иһиттибит, таабылга илии баттаатыбыт. Икки массыынанан экскурсияҕа айаннаатыбыт. Улууспут киинигэр Аллараа Бэстээхэ баар тэрилтэҕэ биһигини оскуолабыт выпускнига Владимир Николаевич Колесов көрүстэ. Биһиэхэ маннык бөдөҥ тэрилтэҕэ ким тугу үлэлиирин, туохха эппиэттээҕин туһунан кэпсээбиттэрэ. Үлэһиттэр үлэлэрин олус сөбүлүүллэр эбит, биһигини «үлэлии кэлиҥ» диэн ыҥырдылар. Тэрилтэ 80 бырыһыана биһиги нэһилиэкпит олохтоохторо эбит.
Араас массыына барыта баар. Уолаттарбыт бу тэрилтэҕэ үлэлии барыахтарын баҕардылар. Мин экскурсияны сөбүлээтим, элбэҕи биллим-көрдүм. Учууталларбар Алена Робертовнаҕа уонна Светлана Ивановнаҕа махтанабын. Өссө хаһан эмит атын тэрилтэҕэ экскурсиялыы барыахпыт диэн эрэнэбит.
Сайаан Старостин,
В.Н.Оконешников аатынан Павловскай орто оскуолатын үөрэнээччитэ
