Майатааҕы Мария Дмитриевна Лукина салайааччылаах “Түмэн” уопсастыбаннай холбоһук анал байыаннай дьайыыга сылдьар биир дойдулаахтарбытыгар ыытар үлэлэригэр Ф.Г.Охлопков аатынан Майа орто оскуолтын 9-с «б» кылааһын оҕолоро иккитэ кэлэн көмөлөстүлэр.
“Дьол түһүлгэтэ” уопсастыбаннай киин дьиэтэ эргэрэн, кэлин тымныыта бэрт буолан уопсастыбанньыктар халыҥ таҥастаах олорон араас көмөлөрү оҥорон кэлбиттэрэ. Соторутааҕыта Анна Петровна Васильева салайааччылаах 9 “б” кылаас уолаттара Айтал Устинов, Эрчим Марков, Вадим Егоров кэлэн Федора Ивановна Наумова салайааччылаах иис сыаҕын эркиннэрин таһыттан хаарынан сыбаабыттара. Ахсынньы 1 күнүгэр 9 “б” кылаас кыргыттара саа уоһугар хаа тиктилэр. Сандаара Алексеева, Милена Лукачевская, Люба Ксенофонтова, Люба Шарина, Нарыйа Попова, Айталыына Парфенова, Валя Еремеева, Дайаана Апросимова, Юмико Чирикова салгыы тигэргэ диэн элбэх таҥаһы кырыйан бэлэмнээтилэр.
9 “а” кылаастан Ярик Михайлов, 10 “а” кылаастан Арылхан Попов, 10 “б” кылаастан Сайдам Сыроватскай бу күн уопсастыбанньыктар иһэр ууларын бэлэмнээн дьиэҕэ турар буочуканы мууһунан толордулар итиэннэ тиэргэн иһинээҕи суолу-ииһи оҥордулар, тас өттүн хаарын күрдьэн ыраастаатылар. Үөрэнээччилэр өссө көмөлөһө кэлиэхпит диэн тарҕаспыттар.
Оҕолор көмөлөһөннөр “Дьол түһүлгэтэ” биллэ сылыйан, уопсастыбанньыктар махталлара улахан, оҕолорго чэгиэн доруобуйаны, үөрэхтэригэр ситиһиилэри баҕараллар.
Марелла Баишева.
