Саха Өрөспүүбүлүкэтин бырабыыталыстыбатын ааспыт сыллааҕы үлэтин отчуоттуур үһүс бөлөх күн иккис аҥарыгар Ороссолуода олохтоохторун кытта көрүстэ.
Бөлөх салайааччыта Саха Өрөспүүбүлүкэтин гражданскай оборона дьыалаларыгар уонна нэһилиэнньэҕэ куттал суох буолуутун хааччыйыыга миниистири солбуйааччы Никита Павлов ыытыллыбыт үлэни хайысхаларынан тыыран билиһиннэрдэ, онтон олохтоохтор отчуот сүнньүнэн уонна тус долгутар ыйытыыларын, туруорсууларын иһитиннэрдилэр. Кинилэр хаарбах дьиэттэн көһөрүү бырагыраама болдьоҕун, хомунаалынай тарыыптар араастаһыыларын, Өлүөнэ өрүһү туоруур муоста бырайыагын нэһилиэнньэҕэ билиһиннэрии, дьүүллэһии хаһан буолуоҕун, күөх төлөн ситимэ тардыллыа диэн кэпсэтии ханна тиийбитин, Чыамайыкыга көстүбүт сир баайын хостооһуҥҥа үлэ хаһан саҕаланарын, дьиэ туттуутугар бырагыраамаларга хапсыбат араҥаҕа туох көмө баарын, о.д.а. туоһуластылар.
Семен Сивцев өрүһү туоруур муоста тутулуннаҕына нэһилиэк олохтоохторо сирбитигэр-уоппутугар улахан охсуулаах буолар диэтэ. Нэһилиэнньэ олус көхтөөҕүн этэн туран, Иван Афанасьев култуура киинин тутууну туруорсалларын эттэ. Афанасий Сивцев тыа сиригэр анаан дьоҕус хотон туттарга каркаастан таҥыллар, хомуллар тутууну оҥоруохха диэн этии киллэрдэ, куоракка тыа хаһаайыстыбатын бородууксуйатын сыаната олус ыараханын ыйан туран, манна субсидия курдук көмө көрүллэрэ буоллар диэн санаатын үллэһиннэ.
Култуура, успуорт киинин тутуу, нэһилиэнньэ кыаммат араҥатыгар олорор усулуобуйаларын тупсарыыга анал бырагырааманы олохтооһун, уопсай хотон, оҕуруот аһын харайар сир тутууларын, саҥа кыбаарталга ититии уонна уу ситимнэрин тардыыга көмө, гаастааһын, сибээһи тупсарыы курдук Ороссолуода олохтоохторун туруорсууларын нэһилиэк баһылыга Илья Макаров түмэн, бырабыыталыстыба бөлөҕүн салайааччытыгар суругунан туттарда.
Бэртээхэй оскуола дьиэтигэр отчуоту истэ кэлбит Ороссолуода 45 олохтооҕо Саха Өрөспүүбүлүкэтин толоруулаах былааһын үлэтин биһириибит диэтилэр.
Февронья ОХЛОПКОВА.
