Олоҥхо дьиэтигэр – таайтарыылаах таҥха күннэрэ

Гаврил Колесов аатынан Олоҥхо дьиэтин үлэһиттэрэ үүнэр көлүөнэни саха төрүт үгэстэрин кытары билиһиннэриигэ утумнаах үлэни ыыталлар. Бүгүн, тохсунньу 16 күнүгэр, Р.И.Брызгалов аатынан Аллараа Бэстээхтээҕи Тырааныспар техникумун устудьуоннара «Таайтарыылаах таҥха» аһаҕас кылаас чааһыгар ыалдьыттаатылар.  

Эдэр оҕолорго ыраастаныы, арчылааһын сиэрин-туомун толоро, атах тэпсэн олорон сэһэргэһэ Дьабыыл нэһилиэгиттэн айылҕаттан айдарыылаах, идэлээх, эдэр алгысчыт Денис Оконешников анаан-минээн кэлэн үлэлии сылдьар. Устудьуон оҕолор, ыччаттар арыылаах алаадьы, быырпах уос-тиис үллэһиннилэр, Денис Викторович умсугутуулаах кэпсээннэрин, сэһэнин олус үчүгэйдик болҕойон олорон иһиттилэр.

Аныгы ыччаттар диэтэххэ, дьылҕа, оҥоһуу, таҥха диэн өйдөбүллэри интэриэһиргииллэрин, ыйытыылары биэрэллэрин бэлиэтиэххэ сөп. Оҕолор бу күн болҕомтолоохтук олорон тугу истибиттэрин дьолоҕойдоругар түһэрэн, инники олохторугар сиэри-туому, өбүгэлэрбит үгэстэрин тутуһа сылдьыахтара диэн эрэнэрин туһунан Олоҥхо дьиэтин уус-уран салайааччыта Айта Васильева иһитиннэрэр.