«NeoOlonkho. Аан дойду эпостара Олоҥхо дойдутугар» диэн бэстибээл чэрчитинэн бүгүн, ахсынньы 4 күнүгэр, Дьокуускай куоракка П.А.Ойуунускай аатынан Саха тыйаатырын уораҕайыгар «Норуот уус-уран айымньытын, эпическэй нэһилиэстибэтин сөргүтүү уонна үйэтитии суоллара» диэн бастакы Эригийиэннэр икки ардыларынааҕы научнай-практическай пуорум буолан ааста.
Киэҥ ыҥырыылаах пуоруму көҕүлээн тэрийээччинэн Г.Г.Колесов аатынан Олоҥхо дьиэтэ, Мэҥэ Хаҥалас улууһун култуураҕа управлениета буолаллар.
Бу күн пуорумҥа кыттыыны ыла ыраахтан: Алтайтан, Казахстантан, Киргизияттан, Хакасияттан, Башкирияттан итиэннэ өрөспүүбүлүкэбит 22 улуустарыттан ускуустуба, култуура диэйэтэллэрэ, учуонайдар, уһуйааччылар, олоҥхо дьиэлэрин үлэһиттэрэ, норуот уус-уран айымньытын исписэлиистэрэ кэллилэр.
Тэрээһин үөрүүлээх аһыллыытыгар мустубут дьону Саха Өрөспүүбүлүкэтин култуураҕа уонна духуобунай сайдыыга миниистирэ Афанасий Ноев, Мэҥэ Хаҥалас улууһун баһылыга Дмитрий Тихонов, ону тэҥэ ыҥырыылаах ыалдьыттар ааттарыттан Казахстантан филологическай билим дуоктара, профессор Булдыбай Анарбай Саигулы, Олоҥхо ассоциациятын бэрэсидьиэнэ Февронья Шишигина эҕэрдэлээтилэр.
Салгыы пуорум кыттыылаахтара «Эпос уонна уопсастыба», «Эпос уонна ускуустуба», «Эпос уонна норуот айымньыта», «Эпос уонна үгэстэр» диэн түөрт хайысханан арахсан үлэлээтилэр, норуот уус-уран айымньытын, эпическэй нэһилиэстибэтин сөргүтүү уонна үйэтитии боппуруостарыгар санааларын үллэһиннилэр.
Күн иккис аҥаарыгар, пленарнай чааска, биэс сүрүн дакылаат истилиннэ, былаһааккаларынан үлэ түмүгүн билиһиннэрдилэр, тэрээһин түмүк быһаарыыта ылылынна. Ол кэннэ «Этно Future Music” аныгылыы муусука уонна этно муусука түһүлгэтигэр эдэр ыччат тоҕуоруһа муһунна.
Бэстибээл култуура эйгэтин көҕүлээһиннэрин өйүүр Бэрэсидьиэн пуондатын гранын көмөтүнэн үбүлэнэр.
