Бу күннэргэ үөрэтэр-оҥорон таһаарар кииҥҥэ үөрэх хайысхатыгар сыллааҕы үлэлэрин түмүгэ – үөрэхтэрин түмүктүүр, идэҕэ тургутар эксээмэннэр буола тураллар. Тургутуу муус устар ортотуттан саҕалаан бу нэдиэлэнэн түмүктэннэ.
Киин дириэктэрин үөрэх чааһыгар солбуйааччы Мария Борисова иһитиннэрбитинэн, барыта улуус үрдунэн 11-с кылааһы бүтэрэр 143 оҕо эксээмэн туттарда. Быйыл В категориялаах суоппар, В, С категориялаах тырахтарыыс, парикмахер, иистэнньэҥ, столяр-мебельщик, маляр-штукатур идэлэригэр эксээмэн туттардылар. Бу – Майаттан В.П.Ларионов, Ф.Г.Охлопков аатынан оскуолалары, И.Г.Тимофеев атынан Майатааҕы лиссиэй, Хара, Аллараа Бэстээх 2 оскуолатыттан, Павловскай, Хаптагай, Ороссолуода, Мэлдьэхси, Төҥүлү, Хорообут, Чүүйэ оскуолаларын бүтэрээччилэр.
Эксээмэн тутар хамыыһыйаҕа киин салалтата, преподавателлэрэ, маастардара, атын оскуолалартан учууталлар уонна кэккэ тэрилтэлэр бэрэстэбиитэллэрэ, холобур, Гостехнадзор иниспиэктэрэ, парикмахердар үлэлээтилэр.
Эксээмэн 2 түһүмэхтээх – теоретия уонна практика. Теориятын туттарбыт эрэ оҕолор квалификационнай, ол эбэтэр практическай эксээмэнигэр ааһаллар. Үчүгэй бэлэмнээх оҕолор тута 2 түһүмэҕи ааһаллар, ыарырҕаппыт оҕолор хос туттараллар. Барытын туттардахтарына идэҕэ үөрэммиттэрин туоһулуур сибидиэтэлистибэ ылаллар. Онон салгыы ГАИ-га, Гостехнадзорга массыынаны ыытар быраап ыларга эксээмэн туттара бараллар. Атын идэлэргэ үөрэммит оҕолор үлэҕэ киириэхтэрин, ылбыт идэлэрин олохторугар туһаныахтарын сөп.