Бүгүн, сэтинньи 2 күнүгэр, Догдоҥо нэһилиэгэр «Алгыс» түөлбэҕэ норуот ырыаһыта, олоҥхоһута, ССРС Суруйааччыларын сойууһун чилиэнэ, Аҕа дойду Улуу сэриитин кыттыылааҕа Николай Иванович Степанов‒Ноорой аатын үйэтитэр сыаллаах, олорон ааспыт өтөҕөр, үөрүүлээх быһыыга-майгыга анал бэлиэ сурук туруорулунна.
Бу «Олох салҕанар утума» бырайыагы көмүскээммит биир дойдулаахпыт, биллэр-көстөр олонхоһуппут, тойуксуппут Ноорой сырдык аатын үйэтитэн, олорон ааспыт өтөҕө күрүөлэннэ-хаһааланна. Тэрээһини алгысчыт, олохтоох култуурабыт үлэһитэ Николай Новгородов аал уоту арыылаах алаадьынан күндүлээн айах тутан, мустубут дьону-сэргэни арчылаан сиэр-туом толордо. Үөрүүлээх тэрээһиҥҥэ мустубут биир дойдулаахтарын эҕэрдэтин уонна инники былааннары, Н.И.Степанов‒Ноорой оҕолорун, ыччаттарын көмөтүнэн, биир сүбэнэн өтөҕүн сөхсүтүү үлэтин салҕааһын, кэлин мусуой оҥорор баҕа санаалар баалларын бэлиэтээн нэһилиэк баһылыга Петр Сивцев тыл эттэ. Ноорой өтөҕүн күрүөлээһин үлэтигэр ылсан үлэлэспит Борис Избековка олохтоох дьаһалта аатыттан Махтал сурук туттарыллынна. «Алгыс» түөлбэбит аҕам саастаах олохтооҕо Спартак Титов Н.И.Степанов‒Ноорой, үтүөкэн киһи, норуот ырыаһыта, олоҥхоһута олорон ааспыт кэмнэрин туһунан ахтан-санаан ааста. Ноорой сиэнэ Аксинья Степанова, эһэтин туйаҕын хатарбыт кыыс, тойуксут, Олоҥхо дьиэтин култуура үлэһитэ эһэлэрин Ноорой олорон ааспыт өтөҕүн күрүөлээн-хаһаалаан, бэлиэ сурук оҥотторон, улууспутугар, өрөспүүбүлүкэбитигэр биллэр ааттаах-суоллаах, тарбахха баттанар олоҥхоһуппутун кэриэстээн үтүө түмүктээх үлэлэр барбыттарын бэлиэтээн, Ноорой оҕолорун, сиэннэрин аатыттан махтал тылларын тиэртэ. Бэйэтин эҕэрдэтин «Алгыс» түөлбэ салайааччыта Светлана Иванова хоһоонун ааҕан, үөрүүлээх түгэнинэн эҕэрдэлээтэ. Биһиги нэһилиэккэ бу улахан суолталаах тэрээһини иилээн-саҕалаан олохтоох култуура үлэһитэ Туйаара Старостина ыытта. Мустубут түөлбэ, нэһилиэк олохтоохторо алгыстанан, арчыланан биир үөрүүлээх, улахан суолталаах тэрээһиҥҥэ кыттыыны ылан, сэргэхсийэн, уопсай хаартыскаҕа түһэн, үөрэн-көтөн тарҕастылар. Күммүт сандааран, чаҕылыччы күндээрэн биир үтүө бэлиэ күнү бэлэхтээтэҕэ.
Светлана Иванова‒Намыына.
Догдоҥо нэһилиэгэ
