Төҥүлүгэ «Олох киэҥ аартыгынан»кинигэ-альбом сүрэхтэниитэ үрдүк таһымнаахтык ыытылынна. Манна Төҥүлү орто оскуолатын 1974 с бүтэрбит выпускниктар олохторун, үлэлэрин, ситиһиилэрин, иллэҥ кэмҥэ дьарыктарын туһунан суруллубут.
Кинигэ тула кэпсэтиигэ оскуола дириэктэрэ Сотников Вячеслав Егорович, өр сылларга дириэктэрдээбит Шарина Галина Иннокентьевна, билигин орто дойдуга суох бииргэ үөрэммит доҕотторун чугас дьонноро, бибилэтиэкэрдэр Петрова Лаана Алексеевна, Сотникова Саргылана Анатольевна, оскуоланы бүтэрээччилэр ааттарыттан Аля Прокопьева кытыннылар. Саамай долгутуулааҕа үөрэппит учууталлара Роза Трофимовна Анисимова үөрэнээччилэрин туһунан этиитэ буолла: «Оҕолорум олус бэрээдэктээх, үөрэххэ, билиигэ-көрүүгэ тардыһыылаах буоланнар олоххо элбэх ситиһиилээхтэр. Күн бүгүнүгэр диэри бииргэ тутуһан сылдьаллар», — диэн үөрэрин биллэрдэ. Выпуск айар куттаахтара хоһооннорун ааҕан иһитиннэрдилэр, дьоҕурдаах иистэнньэҥнэр, уустар оҥоһуктарын быыстапкатын сэҥээрэ көрдүбүт.
«Ой дуораана» оҕо ансаамбыла ырыанан киэргэттэ. Түмүккэ Игнатьев Виктор Георгиевич байааҥҥа доҕуһуоллаан «Умнуллубат онус кылаас» күргүөмүнэн ылланна, Марфа Александровна Харитонова оһуохай таһаарда, бииргэ үөрэммиттэр ааттарыттан Птицын Петр Семенович тыл эттэ. Кинигэ сүрэхтэниитин Марфа Александровна Харитонова, Николай Гаврильевич Толстяков, Марианна Никоновна Товарова ыыттылар.
Үөрүүлээх тэрээһин иккис чааһынан 74-с выпустар уонна оскуола улахан кылааһын уолаттарын икки ардыгар дартска, волейболга, канат тардыһыытыгар күрэхтэһии ыытылынна. Волейболга, ханаат тардыһыытыгар 74-с кыайдылар, дартса оскуола уолаттара кыайдылар.
Билигин даҕаны эдэрдии эрчимнээх, элбэх үтүө үгэстэрдээх, түмсүүлээх 74-с выпустарга дьолу-соргуну, ситиһиини баҕарабыт.
Лаана Петрова, Төҥүлү
