Олунньу 12 күнүгэр улуустааҕы үөрэх управлениетын көҕүлээһининэн А.Е.Зыкова аатынан Майатааҕы “Мичил” оҕону сайыннарар киин 90 сылын көрсө “Дьиэ кэргэн уонна уһуйаан – оҕону иитиигэ биир сомоҕо” диэн улуустааҕы сэминээр буолан ааста.
Сэминээргэ биир идэлээхтэрбит Аллараа Бэстээхтэн, Чүүйэттэн, Бүтэйдээхтэн, Ороссолуодаттан, Павловскайтан, Хараттан, Майаттан уонна Дьокуускай куораттан “Сайдыс” эбии үөрэхтээһин педагогтара Майя Павлова, Марианна Ксенофонтова, Вилюяна Скрябина кыттыыны ыллылар.
Иитээччилэр Матрена Николаева “Дорҕооннуун доҕордоһуу”, Лена Новгородова “Мин дьиэ кэргэним”, Ирина Борисова “Аптаах ахсааннар”, Светлана Николаева “Куорат устун кэрэхсэбиллээх күүлэй”, Елена Апросимова “Оҕоҕо ырыа нөҥүө дьиэ кэргэн өйдөбүлүн тиэрдии” аһаҕас дьарыктары ыыттылар.
Уһуйаан сэбиэдиссэйэ Виктория Бурнашева “Сыыппара нөҥүө оҕо дьоҕурун билэн сайыннарыы”, иитээччи Екатерина Прохорова “Оҕону оонньуу нөҥүө сайыннарыы”, фольклору уһуйааччы Игорь Игнатьев “Хомус – дьиэ кэргэн биһигэ”, физическэй култуура уһуйааччыта Наталья Лонгинова “Наарта нөҥүө ыстаныы”, үҥкүүгэ үөрэтээччи Лидия Артемьева “Сахалыы тэтимнээх хамсаныылар” дьарыктарга, төрөппүт Татьяна Харитонова дьиэ моһуоннаах хаартысканы иилэр тэрили оҥорууга маастар кылаастары көрдөрдүлэр. Уһуйаан иитиллээччилэрэ ырыанан-хоһоонунан, хомуска оонньоон тэрээһини киэргэттилэр.
“Сайдыс” эбии үөрэхтээһин киинин учуутала, методист Майя Павлова “Сахалыы логоритмика”, исписэлиис Марианна Ксенофонтова “Оҕону сахалыы иитии: төрөппүтү кытта үлэлиир ньымалар”, дириэктэри солбуйааччы Вилюяна Скрябина “Оскуолаҕа бэлэмнэнии: дорҕоон үөрэҕэ” тиэмэлэринэн иһитиннэрии оҥордулар. Улуустааҕы үөрэх управлениетын аатыттан оскуолаҕа киириэн иннинээҕи саастаах оҕолору үөрэхтээһин отделын мэтэдьииһэ Мария Ларионова сэминээр кыттыылаахтарыгар уопуту тарҕатыыга үлэлэрин иһин Туоһу суруктары туттарда.
Сэминээр кыттыылаахтара элбэҕи билэн, ырытыһан, салгыы үлэни былааннаатылар. Хас биирдии ыал оҕону иитиитэ үтүө өрүттэрдээх, үгэстэрдээх. Маны оҕо тэрилтэтин иитэр-үөрэтэр үлэтигэр туһанарга, дьиэ кэргэни кытта биир сыалы-соругу туруорунан үлэлэһэргэ эттилэр.
Үбүлүөйдээх тэрээһин чэрчитинэн ыытыллыбыт сэминээр олус наадалаах уонна туһалаах буолла.
Евгения Максимова.
