Мария Захарова.
Балыктаахха 2018 с. Түөлбэ сыла биллэриллэн нэһилиэккэ тупсарыныы үлэтэ тэтимнээхтик, былааннаахтык ыытыллыбыта. Быйыл нэһилиэккэ Аҕа сыла биллэриллибитэ.
Олохтоох дьаһалта бырайыактары көҕүлүүр, дьон-сэргэ маннык хамсааһыны үөрэ-көтө өйүүр.
Бөһүөлэккэ «Аартык» түөлбэҕэ стела оҥоһуутугар бырайыак оҥорон көмүскээтилэр уонна бастакы миэстэни ыллылар. Итиэннэ «Мэҥэ нэһилиэгэ» тыа сирин баһылык Александр Куприянов олохтообут 100000 солкуобайдаах үбүнэн-харчынан бириэмийэлэннилэр. Икки истиэндэни толкуйдаан «Идея» тэрилтэҕэ оҥортордулар. Олохтоохтор күүстэринэн субуотунньуктаан 2019 с. оҥоһуллубут искибиэр иһигэр туруоруллубута.
Бастакы истиэндэ «Өйдүүбүт, саныыбыт, сүгүрүйэбит» диэн түөлбэбитигэр олорон ааспыт дьоммутун-сэргэбитин өйдүү-саныы сылдьар гына эдэр ыччаттар, кэнчээри оҕолор биллиннэр диэн тыыл, үлэ бэтэрээннэрин, дьоруой ийэлэри, үчүгэй көрдөрүүлээх үлэһит дьоммут хаартыскаларын оҥорторбуппут.
Иккис истиэндэҕэ түөлбэ олохтоохторо араас тэрээһиннэргэ кыттыбыт хаартыскалара киллэрилиннэ. Сыл аайы искибиэрбит сэргэх көрүҥнэннин диэн сибэккилэри олордон сайын устата ыал барыта уочаратынан уу куталлар, бүөбэйдииллэр.
Бу күннэргэ түөлбэ салайааччыта Сардаана Стручкова көҕүлээһининэн сайыҥҥы бириэмэҕэ эһэлэригэр, эбэлэригэр күүлэйдии кэлбит сиэннэри, олорор оҕолору мунньан искибиэргэ баар истиэндэ ис хоһоонун сырдатта, кэпсээтэ. Боппуруостарга эппиэттээбит оҕолорго бириис туруортаата.
Түөлбэ ытык дьоно уһуннук бөһүөлэкпит сайдарыгар, үлэтэ-хамнаһа тупсарыгар турууласпыт салайааччы дьоммутун умнуо суохтаахпытын, кинилэр дьон-сэргэ өйүгэр-санаатыгар үтүө өйдөбүл, ыччакка киэн туттуу буолуохтааҕын сиһилии кэпсээбитин мустубут оҕолор сэргээн иһиттилэр.
Салгыы оҕолорбут олорор түөлбэлэрин уулуссатын ыраастааһыҥҥа көхтөөхтүк үлэлээн бэйэлэрэ да астыннылар, атын оҕолору бөҕү бырахпаттарыгар сүбэлиэх буоллулар. Онон оҕолорбут, сиэннэрбит олорор түөлбэлэрин харыстыы, түөлбэ олохтоохторун туһунан билэ улаатыахтара диэн эрэнэбит. Өссө биир күнү анаан искибиэрбитигэр мустан хаартыскаҕа түһүү тэрилиннэ.
