#нацпроекты
#здравоохранение
#президентРФ
Тохсунньу 13 күнүгэр Дьокуускайга өрөспүүбүлүкэ доруобуйа харыстабылын тэрилтэлэригэр 32 УАЗ анал массыына күлүүстэрин СӨ Ил Дархана Айсен Николаев туттарда.
‒ Бу медицинскэй көмөнү оҥоруу саҥа таһымыгар эппиэттиир тырааныспар. Дойдубут Бэрэсидьиэнэ Владимир Путин ыытар бэлиитикэтэ, ону өрөспүүбүлүкэ салалтата салгыы ыытыаҕа. Доруобуйа харыстабыла мэлдьи бастакы турар тыын суолталаах боппуруостарга киирэр, нэһилиэнньэ уһун олохтоох уонна доруобай буоларыгар болҕомто хаһан баҕар ууруллуохтаах», – диэтэ Ил Дархан.
Бу тырааныспар ыарыһахтары балыыһаҕа тиксэрэргэ уонна ыраах сытар нэһилиэнньэлээх пууннарга лабораторнай чинчийиигэ аналлаах матырыйааллары, эмтиир препараттары тиксэрэргэ ананар. “Б” категорялаах бастакы суһал көмөнү оҥорор тэрилинэн хааччылыбыттар, хоту сир усулуобуйатыгар үлэлиир кыахтаахтар.
Өрөспүүбүлүкэ араас муннуктарыттан кэлбит улуус кылаабынай быраастара, кинилэр солбуйааччылара кэлин сылларга доруобуйа харыстабылын алын сүһүөҕэр материальнай-тэхиньиичэскэй баазаны саҥардыыга, бөҕөргөтүүгэ үгүс өртүттээх үлэ ыытылларын тоһоҕолоон бэлиэтээн дойду, өрөспүүбүлүкэ салалталарыгар махтаннылар. 2018 ‒ 2023 сс. Саха сирин доруобуйа харыстабылын тэрилтэлэрэ 313 саҥа авто-тырааныспарынан хааччылыннылар.
‒ Мэҥэ Хаҥалас улууһугар “Доруобуйа харыстабыла” федеральнай национальнай бырайыагынан 2019 сылтан уопсайа 14 саҥа анал тырааныспар кэллэ, ‒ диэн кэпсээтэ улуус кылаабынай бырааһын солбуйааччы, СӨ үтүөлээх бырааһа Наталья Федорова. ‒ Биһиги үлэбитигэр медицинскэй суһал көмөнү оҥорууга, тэрийиигэ авто-тырааныспарынан хааччыллыы оруола улахан. Киин сиртэн тэйиччи сытар нэһилиэктэрбит бэйэлэрэ тырааныспардаахтара миэдиктэр үлэлиир усулуобуйаларын, оҥоһуллар өҥө хаачыстабытын тупсарарыыга туһуланар.
Саҥа сылга кэлбит икки УАЗ массыына биирэ Төхтүргэ, иккиһэ Дьабыылга баар быраас амбулаторияларынар ананнылар.
Алена ДОКТОРОВА.
