Мэҥэ Хаҥалас улууһун баһылыга Дмитрий Тихонов улууспут олохтоохторугар ыам ыйын 20 күнүгэр сааскы халаан уутуттан эмсэҕэлээбит Нам улууһун нэһилиэктэригэр гуманитарнай көмө хомуйарга ыҥырыы таһаарбыта.
Майаҕа “Кыталык” уопсастыбаннай киинтэн бүгүн, ыам ыйын 24 күнүгэр, улууспут баһылыгын бастакы солбуйааччы Василий Михайлов иилээн-саҕалаан, «Техкоммунсервис» тэрилтэ оптуобуһунан көмө тобус-толору тиэллэн, Нам улууһугар айаннаата.
Социальнай бэлиитикэ управлениетын начаалынньыга Октябрина Кулешова иһитиннэриитинэн, улууспут 31 нэһилиэгин дьоно-сэргэтэ гуманитарнай көмөҕө көхтөөхтүк кытыннылар. Улуустааҕы социальнай киин дьиэтигэр ыам ыйын 20-23 күннэригэр сарсыарда 9 чаастан киэһэ 21 чааска диэри көмөнү хомуйар пуун үлэлээтэ. Манна нэһилиэктэртэн тэрилтэлэр, түмсүүлэр, биирдиилээн дьон бородуукта, таҥнар таҥас-сап, иһит-хомуос, бытовой тиэхиньикэ, орон таҥаһа, эмп-томп, оҕо оонньуура, кэнсэлээрийэ табаара, тэлэбиисэр итиэннэ харчынан көмө хомуйан туттардылар.
Түмсүүлэртэн, тэрилтэлэртэн, биирдиилээн дьонтон, “Ырыа ыллыгынан” аахсыйа кэнсиэртэн – барыта 310150 солкуобай харчы киирбит. Улууспут бэтэринээрдэрэ Нам улууһун бэтэринээрдэригэр туһаайан сүөһүгэ, сылгыга аналлаах 3 хоппо эми-тому ыыттылар.
Майа дьаһалтатын, култуура, үөрэх управлениеларын, Д.Ф.Ходулов аатынан култуура киинин күүстээх аҥардара көмөнү таһыыга, тиэйиигэ сүүрэн-көтөн күүс-көмө буоллулар.
Бары бииргэ – биир сомоҕо!
Марелла Баишева.
