Балаҕан ыйын 1-кы күнэ – Билии күнэ! Бу оҕо-аймахха ураты бэлиэ күн буолар. Кинилэр сайын устата эт-хаан, өй-санаа өттүнэн бэлэмнэнэн саҥа үөрэх дьылыгар үктэнэллэр. Бу күн кинилэртэн итэҕэһэ суох төрөппүттэр, учууталлар долгуйаллар. Бу күн саамай кэрэ сибэккилэри оҕолор учууталларыгар бэлэх ууналлар. Ииппит-үөрэппит оскуолабытыгар бары махтанабыт, иһирэхтик саныыбыт.
Н.В. Петров аатынан Дьабыыл орто агротехнологическай хайысхалаах оскуолатыгар 2023-2024 үөрэх дьылыгар 57 оҕо үөрэниэҕэ. Оскуола дириэктэринэн Василий Петров, үөрэх чааһыгар сэбиэдиссэйинэн Нюргуяна Жиркова, дириэктэри иитэр үлэҕэ солбуйааччынан Марина Жиркова ананан үлэлэрин саҕалаатылар.
Оскуолаҕа маҥнайгы кылаас боруогун 7 кырачаан атыллаата. Кинилэри Фекла Канаева үөрэтиэҕэ. 11-с кылааска 7 оҕо киирдэ. Кылаас салайааччытынан Фекла Аммосова ананна. Ыҥырыылаах ыалдьыттар – Саха сиринээҕи “Саҥа технологиялар институттарын” дириэктэрэ Айаал Соловьев, улуус дьаһалтатыттан ЕДДС начаалынньыгын солбуйааччы Федор Герасимов, улуустааҕы үөрэх управлениетыттан информационнай-аналитическай отдел сүрүн исписэлииһэ Афанасий Ефимов истиҥник эҕэрдэлээн туран Ил Дархан, улуус дьаһалтатын, үөрэх управлениетын ааттарыттан бэлэхтэрин кырачааннарга үөрүүлээх быһыыга-майгыга туттардылар. Ону сэргэ, олохтоох дьаһалта баһылыга Дмитрий Петров, оскуола дириэктэрэ Василий Петров, настаабынньык педагог Сандаара Федотова саҥа үөрэх дьылынан истиҥ-иһирэх эҕэрдэлэрин анаатылар.
Оскуола үөрэнээччилэригэр саҥа үөрэх дьылыгар элбэх билиини сомсон, саҥа кирбиилэри дабайалларыгар баҕарабыт.
2023 с. 9 оҕо үөрэнэн бүтэрбитэ. Кинилэртэн 3 оҕо үрдүк, 5 оҕо орто анал үөрэхтэргэ туттарсан киирдилэр.
Марелла Баишева.
