Олунньу 15 күнүгэр Ф.С.Аргунов аатынан Тааттатааҕы оҕо ускуустубатын оскуолатын көҕүлээһининэн Дьокуускай куоракка педагог-пианист А.М.Савватеева 80 сааһын туолар сырдык кэриэһигэр эдэр пианистар 3-с аһаҕас өрөспүүбүлүкэтээҕи “Биһиги – пианистарбыт!” куонкурустара буолла.
1945-1997 сс. олорон ааспыт, Тааттатааҕы оҕо муусукатын оскуолатын фортепиано кылааһын учуутала Анна Михайловна Савватеева оҕо-аймах муусукаҕа дьоҕурун сайыннарыыга олоҕун анаабыта. Кини үөрэнээччилэрин үрдүк ситиһиилэрэ учуутал бу эйгэҕэ киэҥ билиитин-көрүүтүн, үөрэтэр ньымата көдьүүстээҕин көрдөрбүттэрэ, төрөппүттэр махталларын ылбыта, биир идэлээхтэрэ маастарыстыбатын сыаналаабыттара. Учуутал идэтигэр бэриниилээҕэ, тулалыыр эйгэтигэр үтүө сыһыана олох киэҥ аартыгар ситиһиилээхтик хардыылыылларыгар олук уурбутун үөрэнээччилэрэ, ханнык да эйгэҕэ үлэлээтэллэр, мэлдьи махталынан ахталлар, үүнэр көлүөнэҕэ тиэрдэргэ кыһаллаллар.
Манна өрөспүүбүлүкэ араас муннугуттан муусука кэрэ эйгэтигэр уһуйуллар 75 бастыҥтан бастыҥ үөрэнээччилэр түмсэн күрэхтэстилэр.
Өрөспүүбүлүкэтээҕи куонкурус бастакы чааһыгар мэдиссиинэ билимин хандьыдаата, ХИФУ доцена, М.Е.Николаев аатынан 1-кы нүөмэрдээх Мэдиссиинэ национальнай киинин “Мэйии уонна нейрогенетика” киинин салайааччы, А.М.Савватеева үөрэнээччитэ Алексей Таппахов “Мэйии уонна муусука” тиэмэҕэ лиэксийэтин иһиттилэр. Ол кэннэ Алексей Алексеевич классическай уонна биллэр саундтректар муусукаларын бэйэтиттэн тупсаран рояльга оонньоото.
Куонкурус дьүүллүүр сүбэтигэр бэрэссэдээтэлинэн муусука үрдүкү оскуолатын фортепиано салаатын доцена Альбина Герасимова, чилиэннэринэн М.Н.Жирков аатынан муусука коллеһын фортепиано салаатын сэбиэдиссэйэ Лира Кулаковская, муусука үрдүкү оскуолатын фортепиано салаатын доцена Сергей Лебедев уонна А.М.Савватеева кыыһа, 1-кы нүөмэрдээх оҕо ускуустубатын оскуолатын учуутала Яна Савватеева үлэлээтилэр.
Өрөспүүбүлүкэтээҕи куонкурус түһүлгэтигэр М.К.Попова аатынан Майатааҕы оҕо ускуустубатын оскуолатын фортепиано салаатын үөрэнээччилэрэ үрдүк таһымнаахтык кытыннылар. СӨ үөрэҕириитин уонна култууратын туйгуна, фортепиано кылааһын учуутала Светлана Маркова үөрэтэр оҕолоруттан 8-с кылаас үөрэнээччитэ, оҕо ускуустубатын оскуолатын быйыл бүтэрээччи Вилена Цыпандина В.А.Моцарт “Соната си-бемоль мажор”, З.Степанов “Ритуальный танец шамана” айымньыларын толорон Гран-при үрдүк аатын ылары ситистэ. 5-с кылаас үөрэнээччитэ Карина Романова Г.Григорян “Рассказ маленького охотника”, Л.В.Бетховен “Сонатина. Фа мажор” толорон 1-кы истиэпэннээх лауреат, 5-с кылаас үөрэнээччитэ Нарияна Романова Г.Григорян “Якутский танец”, И.С.Бах “Двухголосная инвенсия” толорон 3-с истиэпэннээх дипломант буоллулар. 2-с кылаас үөрэнээччитэ Милана Кириллина бастакытын маннык үрдүк таһымнаах куонкуруска ситиһиилээхтик кыттан Туоһу суругунан бэлиэтэннэ. Кыайыылаахтар харчынан бирииһинэн итиэннэ өйдөбүнньүк бэлэҕинэн наҕараадаланнылар. Оҕолор бэйэлэрин бырагыраамаларын үрдүк таһымнаахтык толорон дьүүллүүр сүбэ хайҕалын ыллылар.
Светлана Николаевнаны уонна оҕолорбутун айымньылаах үлэлэригэр үрдүк ситиһиилэринэн истиҥник эҕэрдэлиибит!
Марелла Баишева.
