Тохсунньу 17 күнүгэр Р. Г. Васильев аатынан улуустааҕы кыраайы үөрэтэр түмэлгэ биһиги ытыктыыр, киэн тутта ааттыыр киһибит, Саха сирин биир биллиилээх живописеһа, РСФСР Худуоһунньуктарын сойууһун Саха сиринээҕи отделениетын бырабылыанньатын бэрэссэдээтэлинэн үлэлээн киэҥ уопсастыбаннай үлэни ыыппыт, Саха АССР ускуустубатын үтүөлээх диэйэтэлэ, ССРС Худуоһунньуктарын сойууһун чилиэнэ, Саха АССР 4-с ыҥырыылаах Үрдүкү Сэбиэтин дьокутаатынан үлэлээбит Михаил Васильевич Лукиҥҥа анаммыт альбом кинигэ сүрэхтэниитэ буолан ааста.
Тэрээһин саҕаланыытыгар түмэл быыстапканы туруорууга исписэлииһэ Михаил Трифонов Саха АССР ускуустубатын үтүөлээх диэйэтэлэ, ССРС Худуоһунньуктарын сойууһун чилиэнэ Михаил Васильевич Лукин уруһуйдаабыт хартыыналарын ыалдьыттарга билиһиннэрдэ. Арктикатааҕы култуура уонна ускуустуба институтун 2-с кууруһун устудьуона Арслан Иванов ускуустуба интэллиэгин нөҥүө хартыыналары тыыннааҕымсытан видео оҥорбутун тэрээһин кыттыылаахтара сэҥээрэ көрдүлэр.
Бастакы тылы биллиилээх худуоһунньук Михаил Лукин кыыһа, альбом ааптара, худуоһунньук-живописец, Россия Худуоһунньуктарын сойууһун чилиэнэ, СӨ ускуустубатын үтүөлээх диэйэтэлэ, РФ үтүөлээх худуоһунньуга, Арктикатааҕы култуура уонна ускуустуба институтун живопись уонна графика кафедратын доцена Марианна Михайловна Лукина эттэ. Салгыы альбом кинигэ ырытыытын тэрээһин ыытааччыта И.М.Сосин аатынан улуустааҕы киин бибилэтиэкэ бибилэтиэкэрэ Марина Трифонова оҥордо. Альбом кинигэ бэчээттэнэн тахсарыгар сүҥкэн өҥөлөөх, Национальнай ойуулуу-дьүһүннүүр ускуустуба түмэлин научнай-чинчийэр салаатын старшай научнай үлэһитэ, искусствовед, Арассыыйа Худуоһунньуктарын сойууһун чилиэнэ, СӨ култууратын үтүөлээх үлэһитэ Галина Афанасьевна Сафронова сиһилии ойуулуур-дьүһүннүүр өттүнэн быһаарда.
Эҕэрдэ тыл эттилэр: Майа сэлиэнньэтин баһылыга Алексей Неустроев, II -с Тыыллыма нэһилиэгин баһылыга Айсен Спиридонов, улуустааҕы култуура уонна духуобунай сайдыы управлениетын начаалынньыгын солбуйааччы Александр Кулешов, Марианна Михайловна үөрэнээччитэ, I -кы Тыыллыма нэһилиэгин түмэлин үлэһитэ Петр Алексеев, М. К. Попова аатынан Майатааҕы оҕо ускуустубатын оскуолатын преподавателэ Анастасия Константинова, СӨ култууратын туйгуна Зоя Шарина, Майа сэлиэнньэтин олохтооҕо Антонина Федорова, аймахтара Мария Лукина, кыраайы үөрэтэр мусуой исписэлииһэ Михаил Трифонов.
Михаил Васильевич Лукин кылгас гынан баран, чаҕылхай олоҕо төрөөбүт Сахатын сирин ойуулуур-дьүһүннүүр ускуустубатын эйгэтигэр биллэр-көстөр суолу хаалларбыта. Михаил Лукин үгүс тиэмэлээх хартыыналары, мэтириэттэри, пейзажтары суруйбута. Кинилэр, сүнньүнэн, Саха сирин хоту өттүн олоҕун-дьаһаҕын, тыйыс айылҕатын, киэҥ нэлэмэн туундаратын өрө көтөҕүллүүлээхтик ойуулаан-дьүһүннээн көрдөрөллөр. Саха сиригэр ойуулуур-дьүһүннүүр ускуустубаны сайдар суолга киллэрбит, бары күүһүн-уоҕун харыстаабакка харса суох үлэлээбит, элбэх үлэни холустаҕа суруйан үйэлэргэ өлбөт тыыннаах хартыына гынан хаалларбыт Михаил Васильевич Лукин аата куруук ааттана туруоҕа.
Марина Трифонова.
