Уопсастыбаннай холбоһуктарга, түмсүүлэргэ
Олунньу 15 күнүгэр улууспутугар өрөспүүбүлүкэ боропсойуустарын федерацияларын күнэ тэрээһиннээхтик ыытыллынна.
Федерация салайааччыта Николай Дегтярев салайааччылаах бөлөх үлэтин Аллараа Бэстээххэ улуус салалтатын кытары көрсүһүүттэн саҕалаата. Аллараа Бэстээх 2 №-дээх оскуолатыгар үрдүкү кылаас үөрэнээччилэригэр кылаас чаастарын ыыттылар. Үөрэх үлэһиттэрин өрөспүүбүлүкэтээҕи боропсойууһун техническэй уонна правовой-техническай иниспиэктэрдэрэ оскуола үлэтин кытары билистилэр, мэтэдиичэскэй көмөнү оҥордулар.
Майаҕа олох-дьаһах хомуналыынай өҥөтүн онорор уонна доруобуйа харыстабылын тэрилтэлэрин кэлэктииптэрин кытта көрүстүлэр. Ф.Г.Охлопков аатынан Майа орто оскуолатын үөрэнээччилэригэр кылаас чааһын ыыттылар.
Күн иккис аҥаарыгар “Кыталык” уопсастыбаннай кииҥҥэ Илин эҥээр уокурук боропсойуустарын уонна өрөспүүбүлүкэтээҕи кэмитиэттэр бэрэссэдээтэллэрэ кыттыылаах сэминээр тэрилиннэ. Чурапчыттан Е.И.Давыдов, Амматтан П.С.Бытыров, Тааттатан П.В.Борисов, Уус Алдантан А.А.Попова салайааччылаах 40-тан тахса киһилээх дэлэгээссийэлэр көхтөөхтүк кытыннылар. Биһиги улууспутуттан 60-тан тахса боропсойуус кэмитиэтин бэрэссэдээтэллэрэ кыттан билиилэрин хаҥаттылар. Сэминээри улуус баһылыгын социальнай боппуруостарга уонна имидж бэлиитикэтигэр солбуйааччы Альбина Григорьева салайан ыытта.
Федерация бэрэссэдээтэлэ Николай Дегтярев өрөспүүбүлүкэ боропсойуустарын федарациятын 2023 сыллааҕы үлэтин сүрүн өртүн билиһиннэрдэ. Бырабыыталыстыба, Ил Түмэн кэмитиэттэрин таһымыгар хамнаһы үрдэтиигэ, үлэ кодексынан көрүллэр социальнай төлөбүрдэр, үлэ миэстэтигэр эчэйии тахсыбатын туһугар ыытыллар үлэлэри кэпсээтэ. Быраап отделын, техническэй иниспиэктэр, юридическай отдел сокуоҥҥа туох уларыйыылар кллэриллибиттэрин билиһиннэрдилэр, боппуруостарга эппиэттээтилэр.
Түмүктүөх иннинэ федерация бэрэссэдээтэлэ бастыҥ салайааччыларыга, бэрэссэдээтэллэргэ бэлиэ наҕараадалары туттарда. Улуус үөрэҕин тэрилтэлэриттэн «Бастыҥ социальнай партнер» бэлиэни Майатааҕы “Кэнчээри” оҕону сайыннарар киин салайааччыта Екатерина Романова, «Үлэҕэ килбиэнин иһин» мэтээли Хаптаҕай оскуолатын саха тылыгар, литературатыгар учуутала, боропсойуус бэрэссэдээтэлэ Анастасия Колесова, анал бэлиэлээх федерация Бочуотунай грамотатын Ф.Г.Охлопков аатынан Майа орто оскуолатын логопед учуутала, боропсойуус бэрэссэдээтэлэ Мария Дмитриева уонна И.М.Романов аатынан Төхтүр орто оскуолатын математикаҕа учуутала, просоюз бэриссидээтэлэ Игорь Максимов, федерация Махтал суругун Үөрэтэр-оҥорон таһаарар киин педагога, боропсойуус бэрэссэдээтэлэ Алена Ефимова туттулар. Итиэннэ ОДьКХ, тыа хайаайыстыбатын, доруобуйа харыстабылын актыыптара бэлиэтэннилэр.
Иниспиэктэрдэр Үөрэтэр-оҥорон таһаарар киин үлэтин билистилэр, мэтэдиичэскэй көмөнү онордулар.
Иннокентий Скрябин.
