Муус устар 12-19 күннэригэр Москва уобалаһын Раменское куоратыгар доруобуйаларынан хааччахтаах дьон ортотугар олорон эрэн волейболга Арассыыйа куубага оонньонно.
Дойду 11 эрэгийиэниттэн 18 хамаанда бастыыр иһин кииристэ. Күрэхтэһиигэ Саха сириттэн 3 хамаанда кыттыыны ылла: эр дьоҥҥо өрөспүүбүлүкэ сүүмэрдэммит хамаандата, дьахталларга Дьокуускайтан “СахаВА” уонна Мэҥэ Хаҥалас “Манчаары” хамаандалара.
Хас да күннээх тыҥааһыннаах күрэхтэһии түмүгүнэн өрөспүүбүлүкэ эр дьоҥҥо хамаандата 3-с бочуоттаах миэстэҕэ таҕыста. Дьахталларга «СахаВА» мэтээл иһин киирсиигэ тиийбэккэ туораата.
Оттон биһиги улууспут волейболист кыргыттара – «Манчаары» хамаанда Москва куорат күүстээх хамаандатын кэнниттэн 2-с бочуоттаах миэстэ буолары ситистилэр.
Эр дьон сүүмэрдэммит хамаандатын састаабыгар биир дойдулаахтарбыт Наахараттан Петр Никитин уонна Хараттан Семен Баишев ситиһиилээхтик оонньоотулар.
Арассыыйа куубагар Саха сириттэн дьахталлар хамаандалара аан бастакытын иккис миэстэ буолбутунан итиэннэ ол ситиһиини биһиги кыргыттарбыт аҕалбыттарынан киэн туттабыт. Дойду киин куоратын сүүмэрдэммит хамаандатын тириэньэрэ Александр Овсянников түмүккэ хамаанда салайааччытыгар Тамара Пермяковаҕа кыраһыабай финал иһин махтаммыт уонна “Күүстээх хамаанданы аҕалбыккын” диэн хайҕаабыт.
Дойду таһымнаах күрэхтэһиигэ Дария Апросимова, Амгалена Кузнецова, Лариса Шишигина, Тамара Пермякова, Петр Никитин РФ успуордун маастарыгар хандьыдаат нуорматын толорбуттар.
Арассыыйа куубагар кыттыыларын туһунан биһиэхэ Москва куораттан Тамара Пермякова иһитиннэрдэ. Хамаанда салайааччыта истиҥ махталын бу айаннарын үбүлээн улахан өйөбүл буолбут муниципальнай оройуон дьаһалтатыгар тиэрдэр.
